နီကိုလပ်စ် ဂျက်ဆင်ရဲ့ ချဲလ်ဆီးကစားသမားဘဝဟာ ဘိုင်ယန်မြူးနစ်ကို အစပိုင်း အငှားစာချုပ်နဲ့ ပြောင်းရွှေ့ခဲ့ပြီးနောက် ပြီးဆုံးသွားပုံရပါတယ်။

ဘိုင်ယန်အသင်းဟာ ဂျက်ဆင်ကို ၂၀၂၅-၂၆ ရာသီအထိ အငှားစာချုပ်နဲ့ ခေါ်ယူဖို့အတွက် ပေါင် ၁၄ သန်း ပေးချေခဲ့တယ်လို့ သတင်းတွေ ထွက်ပေါ်ခဲ့ပါတယ်။ တကယ်လို့ သတ်မှတ်ထားတဲ့ ပွဲအရေအတွက်အထိ ပွဲထွက်ကစားခွင့်ရခဲ့ရင် လာမယ့်နွေရာသီမှာ ပေါင် ၅၆ သန်းနဲ့ အပြီးသတ်ခေါ်ယူလိမ့်မယ်လို့လည်း ဆိုပါတယ်။

ချဲလ်ဆီးအသင်းက ဂျက်ဆင်ကို ၂ နှစ်အကြာက ပေါင် ၃၂ သန်းနဲ့ ခေါ်ယူခဲ့ပြီး ဂျာအို ပက်ဒရိုနဲ့ လီယမ် ဒီလပ်တို့ကို ခေါ်ယူပြီးနောက်မှာ ကမ်းလှမ်းမှုတွေကို လက်ခံဖို့ စိတ်အားထက်သန်နေတဲ့အတွက် ဒါဟာ ချဲလ်ဆီးအတွက် အံ့မခန်း အလုပ်ဖြစ်ခဲ့ပုံရပါတယ်။

ဒါပေမဲ့ ဘိုင်ယန်အသင်းရဲ့အကြီးအကဲ ဟိုနက်စ်ကတော့ ဂျက်ဆင်ကို အပြီးသတ်ခေါ်ယူဖို့အတွက် ပွဲ ၄၀ အထိ ပွဲထွက်ကစားခွင့်ရဖို့ လိုအပ်ကြောင်းနဲ့ ‘ဒါက ဘယ်တော့မှ ဖြစ်လာမှာ မဟုတ်ဘူး’လို့ ပြောကြားခဲ့ပါတယ်။

ဟိုနက်စ်က ဘိုင်ယန်အသင်းဟာ ဂျက်ဆင်ရဲ့အငှားစာချုပ်အတွက် ပေါင် ၁၂ သန်းသာ ပေးချေခဲ့ပြီး တိုက်စစ်မှူးနဲ့ သူ့ရဲ့ကိုယ်စားလှယ်တွေကတော့ ပိုပြီးပေးချေဖို့ သဘောတူခဲ့ကြောင်းလည်း ပြောဆိုခဲ့ပါတယ်။

‘ကစားသမားနဲ့ သူ့ရဲ့ကိုယ်စားလှယ်က ယူရို ၃ သန်း ထပ်ပေးခဲ့တာကြောင့် ကျွန်တော်တို့ ယူရို ၁၃.၅ သန်း ပေးချေခဲ့ရပါတယ်’ ‘အပြီးသတ်စာချုပ်ဆိုတာ လုံးဝကို ရှိလာမှာ မဟုတ်ပါဘူး။ တကယ်လို့ သူ ပွဲ ၄၀ အထိ ပွဲထွက်ခွင့်ရခဲ့ရင်ပဲ အပြီးသတ်ပြောင်းရွှေ့မှာ ဖြစ်ပြီး ဒါကတော့ ဘယ်တော့မှ ဖြစ်လာမှာ မဟုတ်ပါဘူး’ လို့ ဂျာမနီတီဗီလိုင်းဖြစ်တဲ့ SPORT1 ကို ပြောကြားခဲ့ပါတယ်။

ဂျက်ဆင်ဟာ ဒီနွေရာသီမှာ ဘိုင်ယန်မြူးနစ်အသင်းအတွက် ပွဲထွက်ကစားခွင့်ရဖို့ မျှော်လင့်မထားဘဲ အင်္ဂလန်အသင်းခေါင်းဆောင် ဟယ်ရီ ကိန်းရဲ့နေရာကို အရံအနေနဲ့ ကစားပေးရပါလိမ့်မယ်။

ချဲလ်ဆီးကနေ ထွက်ခွာခဲ့ပြီးနောက် ဂျက်ဆင်က ‘ဒီလိုကြီးကျယ်တဲ့ကလပ်အသင်းရဲ့ အစိတ်အပိုင်းတစ်ခု ဖြစ်လာတဲ့အတွက် တကယ်ကို ပျော်ရွှင်မိပါတယ်။ ဘိုင်ယန်က ကမ္ဘာ့အကောင်းဆုံးကလပ်တွေထဲက တစ်ခုပါပဲ။ ဒီမှာ ကစားခဲ့တဲ့ ဂန္တဝင်တွေရဲ့နာမည်တွေကို လူတိုင်းသိကြပြီး ဒီကလပ်က အကြီးမြတ်ဆုံးအောင်မြင်မှုတွေအတွက် ရပ်တည်နေတယ်ဆိုတာကို သိပါတယ်။ ကျွန်တော့်မှာလည်း ကြီးမားတဲ့ ပန်းတိုင်တွေနဲ့ အိပ်မက်တွေ ရှိပါတယ်။ ဘိုင်ယန်အသင်းကို နောက်ထပ် ဆုဖလားတွေ ရရှိအောင် ကျွန်တော့်ရဲ့ အစွမ်းကုန် လုပ်ဆောင်သွားမှာပါ’လို့ ပြောကြားခဲ့ပါတယ်။

ဂျက်ဆင်ဟာ စတမ်းဖို့ဒ် ဘရစ်ချ်ရှိ ပထမဆုံးရာသီမှာ အလားအလာကောင်းတွေ ပြသနိုင်ခဲ့ပြီး ပြိုင်ပွဲစုံ ၁၇ ဂိုး သွင်းယူပေးနိုင်ခဲ့ပေမယ့် ပြီးခဲ့တဲ့ရာသီမှာတော့ ခြေစွမ်းကျဆင်းခဲ့ပါတယ်။ ချဲလ်ဆီးအသင်းဟာ ဘရိုက်တန်ကနေ ဘရာဇီးတိုက်စစ်မှူး ပက်ဒရိုကို ခေါ်ယူပြီးနောက် ဂျက်ဆင်ကို နွေရာသီအပြောင်းအရွှေ့မှာ ထွက်ခွာဖို့ သဘောတူခဲ့တာ ဖြစ်ပါတယ်။

ချဲလ်ဆီးအသင်းဟာ လီယမ် ဒီလပ် ဒဏ်ရာရရှိခဲ့ပြီးနောက် ဂျက်ဆင် ထွက်ခွာဖို့ကို အနည်းငယ် စဉ်းစားခဲ့ပေမယ့် နောက်ဆုံးမှာတော့ ဘိုင်ယန်မြူးနစ်ကို ပြောင်းရွှေ့ခွင့် ပေးခဲ့ပါတယ်။

ဂျက်ဆင်က ‘ကမ္ဘာ့အကြီးဆုံးကလပ်တွေထဲက တစ်ခုအတွက် စာချုပ်ချုပ်ဆိုရတဲ့အတွက် တကယ်ကို ပျော်ရွှင်ခဲ့ပါတယ်။ တစ်ချိန်တည်းမှာပဲ ချဲလ်ဆီး၊ ကျွန်တော့်အသင်းဖော်တွေနဲ့ ပရိသတ်တွေကို ထွက်ခွာရတဲ့အတွက် အနည်းငယ် ဝမ်းနည်းမိပါတယ်။ အဲဒီမှာ ကျွန်တော် တကယ့်ကို ပြင်းထန်တဲ့ စိတ်ခံစားမှုတွေကို ခံစားခဲ့ရပါတယ်။ ကျွန်တော်တို့ ကွန်ဖရန့်စ်လိဂ်နဲ့ ကလပ်ကမ္ဘာ့ဖလားကို ရယူခဲ့ပါတယ်။ အခုတော့ ကျွန်တော့်ရဲ့ ပရောဂျက်အသစ်အပေါ် အာရုံ ၁၀၀ ရာခိုင်နှုန်း ပေးထားပါတယ်။ အယ်လီယန်ဇ် ကွင်းရဲ့ အံ့မခန်းကောင်းမွန်တဲ့ ပတ်ဝန်းကျင်ကို ခံစားဖို့ မစောင့်နိုင်တော့ပါဘူး’လို့ ပြောကြားခဲ့ပါတယ်။

ချဲလ်ဆီးနည်းပြ အန်ဇို မာရက်စ်ကာနဲ့ပတ်သက်ပြီးတော့ ‘ဘောလုံးလောကမှာ သံသရာလည်နေတာတွေ အပြည့်ပါပဲ။ တစ်ခါတလေမှာ အရာတွေက ဖြစ်သင့်သလို မဖြစ်ဘဲ ဘောလုံးပွဲစဉ်ရဲ့ အစိတ်အပိုင်းတစ်ခု ဖြစ်နေပါတယ်။ မာရက်စ်ကာကို ကျွန်တော် လေးစားပါတယ်။ သူ့ဆီကနေ ကျွန်တော် အများကြီး သင်ယူခဲ့ရပြီး သူ့မှာ သူ့ရဲ့ကိုယ်ပိုင် စိတ်ကူးတွေနဲ့ ကစားဟန်ရှိပါတယ်။ ကျွန်တော့်ရဲ့ကစားသမားဘဝ အဆင့်မှာ ကွဲပြားတဲ့အရာတစ်ခု လိုအပ်နေခဲ့တာပါ။ ကျွန်တော့်မှာ နောင်တမရှိဘဲ ချဲလ်ဆီးမှာ ရှိနေခဲ့တဲ့အချိန်တွေအတွက် ကျေးဇူးတင်ရှိပါတယ်’လို့ ဂျက်ဆင်က ဖြည့်စွက်ပြောကြားခဲ့ပါတယ်။

ဂျက်ဆင်ဟာ လာမယ့် စနေနေ့ ဗင်းဆင့် ကွန်ပနီရဲ့အသင်းက ဟမ်းဘတ်ကို ဘွန်ဒက်စ်လီဂါပွဲစဉ်အဖြစ် ရင်ဆိုင်တဲ့အခါ ဘိုင်ယန်မြူးနစ်အသင်းအတွက် ပွဲဦးထွက် ကစားနိုင်ဖွယ်ရှိနေပါတယ်။