ဘာစီလိုနာရဲ့ပါရမီရှင်တောင်ပံကစားသမားလေး လာမိုင်းယာမယ်လ်ဟာ မကြာသေးမီက ကလပ်ဂန္ထဝင်လီယွန်မက်ဆီဝတ်ဆင်ခဲ့တဲ့ ကျောနံပါတ် ၁၀ အင်္ကျီကို ဆက်ခံရရှိထားခဲ့ပြီး ယခုအခါမှာတော့ တောင်ကိုရီးယားကလပ် ဆိုးလ်ကိုအနိုင်ရခဲ့တဲ့ရာသီကြိုခြေစမ်းပွဲစဉ်မှာ အသင်းအတွက်ဂိုးသွင်းယူနိုင်ခဲ့ပါတယ်။

ပွဲအပြီးမှာတော့ ယာမယ်လ်က သူ့အနေနဲ့ ကျောနံပါတ် ၁၀ ကိုဝတ်ဆင်ပြီး ဘာစီလိုနာအတွက်ဂိုးသွင်းပေးနိုင်ဖို့ အိပ်မက်ရှိခဲ့ဖူးပြီး ယခုအခါမှာ‌တော့ လက်တွေ့ဖြစ်လာခဲ့လို့ အလွန်ပျော်ရွှင်ကြောင်း ပြောကြားလာခဲ့ပါတယ်။ ယခုပွဲစဉ်မှာ ဘာစီလိုနာဟာ ယာမယ်လ်ရဲ့သွင်းဂို ၂ ဂိုးအပါအဝင် ၃-၇ ဆိုတဲ့ရလဒ်နဲ့ ဆိုးလ်အသင်းကို တောင်ကိုရီးယားမြေမှာဂိုးပြတ်အနိုင်ယူခဲ့တာဖြစ်ပါတယ်။ 

ပွဲအပြီးမှာ စပိန်လက်ရွေးစင်ကြယ်ပွင့်က "ကျွန်တော်ဂိုးသွင်းနိုင်ခဲ့လို့ အရမ်းပျော်ပါတယ်။ ကျောနံပါတ် ၁၀ ဝတ်ဆင်ပြီး ဘာစီလိုနာအတွက်ဂိုးသွင်းပေးဖို့ ကျွန်တော့်အိပ်မက်ပါ။ ကျွန်တော့်အတွက် ထူးခြားတဲ့ပွဲစဉ်ဖြစ်ခဲ့ပါတယ်။ အသင်းအနိုင်ရခဲ့လို့လည်း ကျေနပ်မိပါတယ်။ ကျွန်တော်တို့ပရိသတ်တွေက ဘယ်နိုင်ငံမှာမဆို ကျွန်တော်တို့ကို အပြည့်အဝအားပေးကြပါတယ်။ လာမယ့်ရာသီမှာ ပရိသတ်တွေအတွက် ဆုဖလားတွေဆွတ်ခူးပေးနိုင်ဖို့မျှော်လင့်ပါတယ်" လို့ပြောကြားခဲ့ပါတယ်။ 

အာရှသို့ထွက်ခွာလာတဲ့ ရာသီကြိုခရီးစဉ်အတွင်း ဘာစီလိုနာဟာ ၂ ပွဲဆက်နိုင်ပွဲဖော်ဆောင်ထားနိုင်ပြီဖြစ်ပြီး လာမယ့်တနင်္လာနေ့မှာတော့ တတိယမြောက်ရာသီကြိုခြေစမ်းပွဲစဉ်အဖြစ် တောင်ကိုရီးယားကလပ် ဒေဂူးနဲ့ ဆက်လက်ယှဉ်ပြိုင်သွားရပါမယ်။