ရီးရဲလ် နဲ့ ပီအက်စ်ဂျီကွင်းလယ်လူဟောင်း မက်ခီလီလီက အသင်းဟောင်းအနေနဲ့ မာကွင်ဟို့စ်ကိုခေါ်ယူသင့်တယ်လို့ တိုက်တွန်းလိုက်ပါတယ်။ ပြင်သစ်ဂန္ထဝင်ဟောင်းက ဘရာဇီးသားရဲ့ခံစစ်စွမ်းဆောင်ရည် နဲ့ ဦးဆောင်နိုင်မှုကို သဘောကျနေပြီး မိုဒရစ်ခေတ်အလွန် သူ့လိုကစားသမားမျိုးလိုအပ်တယ်လို့ ထောက်ပြခဲ့ပါတယ်။

ဒါပေမယ့်လည်း ပီအက်စ်ဂျီအနေနဲ့ သူတို့စတားကို လက်လွှတ်ဖွယ်မရှိဘူးလို့ ဝန်ခံပြောကြားခဲ့ပါတယ်။ ပြင်သစ်ဂန္ထဝင်ဟောင်းဟာ ကွင်းလယ်ခံစစ်နေရာမှာ နာမည်ကြီးလာခဲ့တာဖြစ်ပြီး မက်ဒရစ် ၊ ချဲလ်ဆီး ၊ ပီအက်စ်ဂျီတို့လိုအသင်းတွေမှာ ကစားခဲ့တာဖြစ်ပါတယ်။ မက်ဒရစ်မှာတော့ ဇီဒန်း ၊ ဖီဂို ၊ ရော်နယ်ဒိုတို့နဲ့အတူ အတွဲညီခဲ့တာဖြစ်ပြီး လာလီဂါ ၂ ကြိမ် ၊ ချန်ပီယံလိဂ် ၁ ကြိမ် ၊ ယူအီးအက်ဖ်အေစူပါဖလား ၁ ကြိမ် နဲ့ အင်တာကွန်တီနယ်ဖလား ၁ ကြိမ်တို့ရယူနိုင်ခဲ့ပါတယ်။

အဲ့နောက် ၂၀၀၃ ခုနှစ်မှာ ထွက်ခွာခဲ့ပြီး ချဲလ်ဆီးအသင်းမှာ မော်ရင်ဟိုနဲ့အတူ လက်တွဲကာ ၂ ကြိမ်ပရီးမီးယားလိဂ်ချန်ပီယံဆုရယူနိုင်ခဲ့ပါတယ်။ အဲ့နောက်မှာ ပီအက်စ်ဂျီထံပြောင်းရွှေ့ခဲ့ပြီး ပထမဆုံးကစားသမားအဖြစ် ကစားခဲ့ကာ အဲ့နောက် အသင်းလက်ထောက်အဖြစ် တာဝန်ယူခဲ့ပါတယ်။ အခုချိန်မှာလည်း မက်ခီလီလီက မာကွင်ဟို့စ်ကို ရီးရဲလ်အသင်းမှာ မြင်တွေ့ချင်နေပါတယ်။ 

“ကျွန်တော် မာကွင်ဟို့စ်ကို ရီးရဲလ်အသင်းမှာ အမြဲမြင်ချင်နေတာပါ။ ကျွန်တော် ဒီကောင်လေးကို သဘောကျပါတယ်။ ပီအက်စ်ဂျီမှာတုန်းက သူနဲ့လက်တွဲခဲ့ဖူးပါတယ်။ သူ့အရည်အချင်း ၊ အလုပ်အပေါ်အာရုံစိုက်မှု ၊ စိတ်အားထက်သန်မှု ၊ စိတ်ရှည်မှုလည်း ရှိပါတယ်။ သူက အများကြီးတိုးတက်လာခဲ့တာပါ။ မှန်ပါတယ်။ လက်ရှိမှာ သူကကမ္ဘာ့အကောင်းဆုံးအသင်းဖြစ်တဲ့ ပီအက်စ်ဂျီမှာကစားနေတာပါ။ ဒါပေမယ့် သူ့လိုကစားသမားမျိုးကို ရီးရဲလ်အသင်းမှာမြင်ချင်ပါတယ်။ သူကအရမ်းဉာဏ်ကောင်းသလို အခုချိန်မှာ ကျွန်တော် တစ်ဦးချင်းနေရာမှာကျွမ်းကျင်တဲ့နောက်ခံလူအများကြီးမမြင်မိပါဘူး။

သူက တစ်ဦးချင်းမှာလည်း အရမ်းကောင်းပါတယ်။ ကျွန်တော် ရီးရဲလ်မှာ သူ့ကိုမြင်ချင်တဲ့အိပ်မက်ရှိပါတယ်။ ဒါပေမယ့် ပီအက်စ်ဂျီဘက်ကတော့ လက်လွှတ်မယ်မထင်ပါဘူး”လို့ မက်ခီလီလီက ပြောကြားခဲ့ပါတယ်။

အသက် ၃၁ နှစ်သားဟာ ပီအက်စ်ဂျီအသင်းကိုဦးဆောင်နေပြီး အသင်းနဲ့အတူ ပွဲပေါင်း ၄၉၀ ကျော်ပါဝင်ကစားထားခဲ့ကာ လီဂူးဝမ်း ၁၀ ကြိမ် ၊ ပြည်တွင်းဖလား ၁၄ ကြိမ် နဲ့ ချန်ပီယံလိဂ်ဖလား ၁ ကြိမ်ရယူနိုင်ခဲ့ပါတယ်။ ဒဏ်ရာကနေပြန်လာပြီးနောက် ဘရာဇီးသားဟာ ဘရက်စ်ကို ၃-၀ နဲ့အနိုင်ရခဲ့တဲ့ပွဲမှာ အသင်းအတွက် ပြန်လည်ကစားပေးခဲ့ကာ ပွဲ ၅၀၀ ပြည့်ဖို့ ၄ ပွဲသာ လိုအပ်တော့တာဖြစ်ပါတယ်။ ဆော်ဒီမြေကိုပြောင်းနိုင်တယ်လို့ သတင်းထွက်နေပေမယ့် ကမ္ဘာ့ဖလားကြောင့် ပီအက်စ်ဂျီမှာပဲ ဆက်နေဖို့များနေပါတယ်။

ရီးရဲလ်အသင်းဟာ ခံစစ်ပိုင်းအတွက် ကြိုတင်ပြင်ဆင်နေပြီး ပဲလေ့စ်စတား ဂူဟီအပြင် လီဗာပူးနောက်ခံလူ ကိုနာတေးကိုလည်း စောင့်ကြည့်နေပါတယ်။ မာကွင်ဟို့စ်ထက်စာရင် ဘဏ္ဍာရေးအဆင်ပြေတာကြောင့် လူငယ်ကစားသမားတွေကိုသာ ဦးစားပေးခေါ်ယူဖွယ်ရှိနေပါတယ်။