အိုဆီမန် ဟာ ယခုနွေရာသီမှာ အိုးထရက်ဖို့ဒ် သို့ ပြောင်းရွှေ့ရန် ချိတ်ဆက်ခံထားရတဲ့ ထိပ်တန်းတိုက်စစ်မှူးများစွာထဲမှ တစ်ဦးဖြစ်ပါတယ်။ ယူနိုက်တက်ရဲ့ ၂၀၂၄-၂၅ ရာသီ ပရီးမီးယားလိဂ် တွင် အဆင့် ၁၅ နေရာသို့ ကျဆင်းကာ စွမ်းဆောင်ရည် ဆိုးရွားခဲ့ပြီးနောက် ရူဘင် အမ်မိုရင်ဟာ ယခုနွေရာသီတွင် နံပါတ် ၉ နေရာမှာ ကစားမယ့် တိုက်စစ်မှူးအသစ်တစ်ဦး ခေါ်ယူရေးကို ဦးစားပေးအဖြစ် သတ်မှတ်ခဲ့ပါတယ်။

ယူနိုက်တက်ဟာ ပရီးမီးယားလိဂ်တွင် ကစားသမားတစ်ဦးမျှ ဂိုးသွင်းယူမှုနှုန်း ၁၀ ဂိုးအထိ မပြည့်ခဲ့တဲ့ ထိပ်တန်း ကလပ်အနည်းငယ်ထဲမှ တစ်သင်းဖြစ်ပါတယ်။ ဟွိုက်လန်း နှင့် ဂျိုရှူအာ ဇက်ခ်ဇီး တို့ရဲ့ ရုန်းကန်မှုများကြောင့် ယူနိုက်တက်ဟာ ဗစ်တာ ရောကရက်စ်၊ ဘန်ဂျမင် ဆက်စ်ကို နှင့် အိုဆီမန် ကဲ့သို့ ကစားသမားများကို စိတ်ဝင်စားကြောင်း ထုတ်ဖော်ပြောကြားခဲ့ပါတယ်။

Gazzetta dello Sport သတင်းစာရဲ့ ဖော်ပြချက်အရ ယူနိုက်တက်ဟာ နိုင်ဂျီးရီးယားတိုက်စစ်မှူး အိုဆီမန် အတွက် နာပိုလီ သို့ အပြောင်းအရွှေ့ သဘောတူညီမှု ဖြင့် ချဉ်းကပ်ရန် အသင့်ဖြစ်နေပါတယ်။ အိုဆီမန်ဟာ နာပိုလီ အတွက် ၁၃၃ ပွဲတွင် ၇၆ ဂိုး သွင်းယူထားပြီး ၂၀၂၂-၂၃ ရာသီတွင် ကလပ်ကို စီးရီးအေ ဖလား ရရှိရန် ကူညီပေးခဲ့ပါတယ်။

သို့သော် အန်တိုနီယို ကွန်တီ တာဝန်ယူနေစဉ် ကလပ်တွင် အနာဂတ် မရှိတော့ဘဲ ချဲလ်ဆီး သို့ အပြောင်းအရွှေ့နောက်ဆုံးနေ့ ပြောင်းရွှေ့မှု ပျက်ပြားပြီးနောက် ပြီးခဲ့တဲ့နွေရာသီက ဂါလာတာဆာရေး သို့ အငှားဖြင့် စေလွှတ်ခံခဲ့ရပါတယ်။ အိုဆီမန် ဟာ တူရကီ တွင် ဆက်လက်ခြေစွမ်းပြနိုင်ခဲ့ပြီး ပြိုင်ပွဲအားလုံးတွင် ၃၇ ဂိုး သွင်းယူကာ ဂါလာတာဆာရေးကို လိဂ်ဖလား ရရှိရန် ကူညီပေးခဲ့ပါတယ်။

သူ့ရဲ့ခြေစွမ်းများကြောင့် ယူနိုက်တက် ကဲ့သို့ ချဲလ်ဆီး နှင့် အာဆင်နယ် တို့ရဲ့ မျက်စိကျခြင်းကို ခံခဲ့ရပြီး ထိုအသင်းတွေဟာ တိုက်စစ်ပိုင်း အင်အားဖြည့်တင်းရန် စိတ်အားထက်သန်နေကြပါတယ်။ အိုဆီမန် ကို ပေါင် ၆၃ သန်းဖြင့် ရရှိနိုင်သော်လည်း ချန်ပီယံလိဂ်ဝင်ခွင့် မရရှိခဲ့တာကြောင့် ငွေကြေးအရ ခက်ခဲတဲ့ နွေရာသီကို ရင်ဆိုင်နေရတဲ့ ယူနိုက်တက်ဟာ  အပြောင်းအရွှေ့တွင် ကစားသမားတစ်ဦးကို ထည့်သွင်းခြင်းဖြင့် ထိုပမာဏကို လျှော့ချရန် စိတ်အားထက်သန်နေပါတယ်။

Gazzetta dello Sport က မန်ချက်စတာအသင်းကြီးဟာ အိုဆီမန် ကို အိုးထရက်ဖို့ဒ်သို့ ခေါ်ယူရန် ကြိုးစားနေချိန်တွင် ဇက်ခ်ဇီး ကို ထည့်သွင်းကာ ကမ်းလှမ်းရန် စဉ်းစားနေကြောင်း ပြောကြားခဲ့ပါတယ်။ ယူနိုက်တက်ဟာ ပြီးခဲ့တဲ့နွေရာသီက ဘိုလော့နာမှ ဇက်ခ်ဇီးကို ခေါ်ယူရန် ပေါင် ၃၆.၅ သန်း အကုန်အကျခံခဲ့သော်လည်း ပထမဆုံးရာသီ၌ သုံးဂိုးသာ သွင်းယူနိုင်ခဲ့ပြီး ခြေစွမ်းမပြခဲ့တာ ဖြစ်ပါတယ်။

ယူနိုက်တက်ဟာ နွေရာသီအစောပိုင်းက ဇက်ခ်ဇီး အတွက် အင်တာမီလန် ရဲ့ ချဉ်းကပ်မှုကို ပယ်ချခဲ့ကြောင်း သတင်းများက ဖော်ပြခဲ့သော်လည်း အိုဆီမန် အတွက် သဘောတူညီမှုတွင် နယ်သာလန် လက်ရွေးစင်ကို ထည်သွင်းသွေးဆောင်ရန် အသုံးပြုလိုနေပါတယ်။ အလီဂျန်ဒရို ဂါနာချိုဟာ ဇန်နဝါရီလက နာပိုလီ သို့ ပြောင်းရွှေ့ရန် ချိတ်ဆက်ခံခဲ့ရသော်လည်း အီတလီသတင်းများအရ စီးရီးအေ ချန်ပီယံတွေဟာ ယူနိုက်တက်မှ ထုတ်ပယ်ခံထားရသော ကစားသမားကို စိတ်မဝင်စားတော့ကြောင်း သိရပါတယ်။

သို့သော် ကွန်တီက လူကာကူ အတွက် အရန်တိုက်စစ်မှူးတစ်ဦး ခေါ်ယူရန် စိတ်အားထက်သန်နေသဖြင့် အိုဆီမန် ကို လက်လွှတ်ရန်အတွက် ဇက်ခ်ဇီးကို စိတ်ဝင်စားနိုင်ဖွယ်ရှိပါတယ်။ အိုဆီမန်ဟာ Premier League တွင် ကစားရန် အိပ်ရှိနေတာကြောင့် ဆော်ဒီအာရေးဗျသို့ ကြီးမားတဲ့ ပြောင်းရွှေ့မှုကို ငြင်းပယ်ခဲ့သော်လည်း အယ်လ် ဟီလာလ်ရဲ့ နောက်ထပ် ကမ်းလှမ်းမှုပစ်မှတ် ဖြစ်လာရန် ရှိနေပါတယ်။

သို့သော် နိုင်ဂျီးရီးယားနိုင်ငံသားဟာ ဆုံးဖြတ်ချက်ကို ပြန်လည်ပြင်ဆင်ခြင်းမရှိဘဲ အယ်လ်ဟီလာလ် အား ရောကရက်စ် နှင့် ဆက်ကို အပါအဝင် အခြား ရွေးချယ်စရာများကို ရှာဖွေရန် ပြောထားသလိုဖြစ်နေပါတယ်။ အိုဆီမန် နှင့် ရင်းနှီးတဲ့ ဂျွန်အိုဘီမီခဲလ်က Metro နှင့် အင်တာဗျူးတွင် ယူနိုက်တက် သို့မဟုတ် အာဆင်နယ် သို့ ပြောင်းရွှေ့မှုအကြောင်း ပြောကြားခဲ့ပါတယ်။

"ဒီနွေရာသီက သူ့အတွက် ပရီးမီးယားလိဂ် ပြောင်းရွှေ့မှု ရှိနေဆဲလို့ မျှော်လင့်ပါတယ်" "အာဆင်နယ်နဲ့ ယူနိုက်တက် တို့လို အသင်းတွေက တိုက်စစ်မှူးတစ်ဦး လိုအပ်နေသေးတယ်လို့ ကျွန်တော် ထင်ပါတယ်" "ဟွိုက်လန်းက ယူနိုက်တက် အတွက် မဟုတ်ဘူးလို့ ကျွန်တော် မထင်ပါဘူး။ သူက ပြေးလွှားပြီး ကြိုးစားလုပ်ဆောင်ပေမယ့် ဂိုးသွင်းပေးမယ့်သူ၊ အသင်းကို ထိပ်ဆုံးလေးသင်းထဲ ထည့်ပေးနိုင်မယ့်သူ၊ ဖလားတွေ ရရှိအောင် လုပ်ပေးနိုင်မယ့်သူ မဟုတ်ပါဘူး"

"ဒါကြောင့် ကျွန်တော့်အတွက် ယူနိုက်တက်ဟာ ဦးတည်ရာ ဖြစ်နိုင်ပါတယ်။ သူက ဥရောပမှာ ပေးစွမ်းနိုင်တာတွေ အများကြီး ရှိသေးတဲ့အတွက် အခု ဆော်ဒီကို သွားတာကိုတော့ ကျွန်တော် မမြင်ချင်သေးပါဘူး" "သူ အဲဒီကို သွားတာက ရှက်စရာကောင်းပါလိမ့်မယ်။ ဒါကြောင့် အာဆင်နယ်၊ ယူနိုက်တက်၊ ဂျူဗင်တပ်စ် နဲ့ ပီအက်စ်ဂျီတို့ကလည်း သူ့ရဲ့ ရွေးချယ်စရာတွေ ဖြစ်နိုင်ပါတယ်။ ဘာဖြစ်မလဲ စောင့်ကြည့်ရအောင်ပါ" လို့ ပရီးမီးယားလိဂ် ချန်ပီယံဟောင်းက ပြောကြားခဲ့ပါတယ်။