မိမိကိုယ်ကို ဖျက်ဆီးလိုသော စိတ်ကျန်းမာရေး ပြဿနာများကြောင့် စပိန်အတွက် ယူရို ၂၀၂၄ တွင် မကစားရဖို့ ရှောင်လွှဲရန် ဒဏ်ရာရရှိ သယောင်ဟန်ဆောင်ရန် စဉ်းစားခဲ့ကြောင်း အာလ်ဗာရို မိုရာတာ က ဖွင့်ဟပြောကြားခဲ့ပါတယ်။

စိတ်ခံစားမှုကို ဖွင့်ဟဝန်ခံခြင်းဟာ သူ့ရဲ့ အသစ်ထွက်ရှိထားသော မှတ်တမ်းရုပ်ရှင် Morata: They Don’t Know Who I Am ရဲ့ တစ်စိတ်တစ်ပိုင်း ဖြစ်ပြီး ဘောလုံးသမားဘဝတစ်လျှောက် ပြင်းထန်သော ဝေဖန်မှုများကြောင့် ခံစားခဲ့ရတဲ့ အတွင်းစိတ်မငြိမ်မသက်မှုများကို နက်နက်ရှိုင်းရှိုင်း ဖော်ပြထားပါတယ်။ သူ့အပေါ် နက်ရှိုင်းစွာ သက်ရောက်မှုရှိခဲ့တဲ့ ဖြစ်ရပ်တစ်ခုမှာ ၂၀၂၄ ခုနှစ် ဧပြီလချန်ပီယံလိဂ် ကွာတားဖိုင်နယ်ပွဲစဉ်အတွင်း အသင်းဟောင်း အက်သလက်တီကို မက်ဒရစ် ကို ဒေါ့မွန် က အနိုင်ရရှိခဲ့တဲ့ချိန်တွင် ဖြစ်ပွားခဲ့ပါတယ်။ ရှင်းလင်းတဲ့ ဂိုးသွင်းခွင့်ကို လွဲချော်ပြီးနောက် မိုရာတာက စိတ်ဓာတ်ကျခဲ့ကြောင်း ဖွင့်ဟပြောကြားခဲ့ပါတယ်။

"ဘောလုံးကို ကျွန်တော် လိုက်မကြည့်နိုင်ခဲ့ဘူး။ ကျွန်တော်တို့ ပွဲမရှုံးသေးပေမဲ့ ကိုယ့်ခေါင်းထဲမှာတော့ အက်သလက်တီကိုနဲ့ ချန်ပီယံလိဂ် ဖိုင်နယ်ကို ရောက်ဖို့ အခွင့်အရေးကို လွဲချော်ခဲ့ပြီလို့ပဲ ထင်နေခဲ့တာပါ။ ပွဲပြီးတော့ အဝတ်လဲခန်းထဲမှာ ကျွန်တော် အကြာကြီး တစ်ယောက်တည်း နေခဲ့တယ်။ ကျွန်တော် ငိုချင်ခဲ့တယ်။ အဲဒီကနေ အားလုံး စတင်ခဲ့တာပါ"

"ကိုယ်ခန္ဓာထဲမှာ အရာများစွာကို ခံစားလာရပြီး ဘာကြောင့် ဘယ်လိုဖြစ်မှန်းမသိဘူး။ ခြေထောက်တွေ နာကျင်တယ် ရင်ဘတ်တွေ ကြပ်လာတယ်။ အသက်ရှူလို့ မရဘူး။ အိပ်ပျော်သွားပြီး ပြန်မနိုးထမှာကို ကြောက်တယ် အရာအားလုံးကို ကြောက်ခဲ့တယ်" လို့ သူက ပြောကြားခဲ့ပါတယ်။

အထူးသဖြင့် စိတ်ထိခိုက်စရာ ဝန်ခံချက်တစ်ခုတွင် မိုရာတာ က ယူရို ၂၀၂၄ တွင် စပိန်ကို ကိုယ်စားပြုရမည့် တာဝန်မှ ရှောင်လွှဲရန် ဒဏ်ရာရရှိသယောင် ဟန်ဆောင်ရန် အလေးအနက် စဉ်းစားခဲ့ကြောင်း ထပ်မံ ဖွင့်ဟပြောကြားခဲ့ပါတယ်။

"ကျွန်တော့်မှာ ကြောက်စရာကောင်းပြီး မိမိကိုယ်ကို ဖျက်ဆီးလိုတဲ့ အတွေးတွေ အများကြီး ရှိခဲ့တယ်။ ဒဏ်ရာဟန်ဆောင်ပြီး ယူရိုကို မသွားရဖို့ ကျွန်တော့်ခေါင်းထဲ စဉ်းစားမိသွားခဲ့ပါတယ်" လို့ သူက ပြောပါတယ်။

စပိန်အသင်း ဆရာဝန် အော်စကာ ဆီလာဒါ ကိုပင် ဆက်သွယ်ခဲ့ပြီး ပြိုင်ပွဲတွင် မပါဝင်နိုင်ကြောင်း ပြောကြားခဲ့ပါတယ်။ ဒါကြောင့် ဆီလာဒါက မိုရာတာ နှင့် စပိန်လက်ရွေးစင် ကစားသမားဟောင်း အင်နီယေစတာ တို့ကြား စကားပြောဆိုမှုကို စီစဉ်ပေးခဲ့ပါတယ်။ ၂၀၀၉ ခုနှစ်တွင် ခင်မင်ရင်းနှီးတဲ့ သူငယ်ချင်း ဒန်နီ ဂျာကေး ရဲ့ ကြေကွဲဖွယ် ကွယ်လွန်မှုနောက်ပိုင်း စိတ်ဓာတ်ကျခြင်းနှင့် ရုန်းကန်ခဲ့ရတဲ့ ဘာစီလိုနာ ကြယ်ပွင့်ဟောင်းက မိုရာတာ ကို လမ်းညွှန်မှုနှင့် စာနာစိတ်များ ပေးခဲ့ပါတယ်။ ထိုစကားပြောဆိုမှုက အရေးပါတဲ့ အလှည့်အပြောင်း ဖြစ်ခဲ့ပါတယ်။

စပိန်နည်းပြချုပ် လူးဝစ်ဒီလာဖူရန်တီက မိုရာတာကို ဆက်လက်ပါဝင်ရန် ဆွဲဆောင်ရာတွင် အရေးပါသော အခန်းကဏ္ဍမှ ပါဝင်ခဲ့ပါတယ်။ နည်းပြဟာ ဝါရင့် တိုက်စစ်မှူးအား နိုင်ငံအသင်းမှာ သူ့ရဲ့ ဦးဆောင်မှုနှင့် အတွေ့အကြုံကို လိုအပ်ကြောင်း ပြောကြားခဲ့ပါတယ်။ ထိုမက်ဆေ့ချ်က မိုရာတာအား အားနည်းချက်ရှိသော ကာလအတွင်း အရေးတကြီး လိုအပ်နေသော အရေးပါမှု၏ ခံစားချက်ကို ပြန်လည်ရရှိစေခဲ့ပြီး စပိန်ဟာ ပြိုင်ပွဲကို ဆက်လက်အနိုင်ယူခဲ့ပါတယ်။

ရိုဒရီ၊ ဒန်နီ အိုလ်မို၊ နီကို ဝီလျံ၊ မီကယ် အိုရာဇာဘယ်လ် နှင့် အဲလက်စ် ရီမီရို အပါအဝင် အခြားလက်ရွေးစင် အသင်းဖော်များကလည်း မှတ်တမ်းရုပ်ရှင်တွင် ပါဝင်ခဲ့ပါတယ်။ ဒါဟာ ပြိုင်ပွဲကာလအတွင်း အိုရာဇာဘယ်လ် နှင့် ရီမီရို တို့နှင့်အတူ လေ့ကျင့်ရေးအပြင် အပန်းဖြေ ဂေါက်သီးရိုက်ခြင်းကို “ကုထုံးတစ်မျိုး” အဖြစ် အထူးကျေးဇူးတင်ကြောင်း ပြောကြားခဲ့ပါတယ်။

မိုရာတာဟာ လက်ရွေးစင်ကစားသမားဘဝ မကြာမီ ပြီးဆုံးနိုင်ကြောင်း အရိပ်အမြွက် ပြောကြားခဲ့ပါတယ်။ စပိန်ရဲ့ နေးရှင်းလိဂ် ဖိုင်နယ်တွင် ပေါ်တူဂီကို ရှုံးနိမ့်ခဲ့တဲ့ပွဲ၌ အရေးကြီးတဲ့ ပင်နယ်တီကို လွဲချော်ပြီးနောက် သူဟာ လာရိုဂျာ နှင့် ဆက်လက် ကစားသင့်၊ မသင့်ကို ပြန်လည်စဉ်းစားနေကြောင်း ဝန်ခံခဲ့ပါတယ်။ သို့သော် ၂၀၂၆ ကမ္ဘာ့ဖလားကို မျှော်မှန်းထားသဖြင့် တိုက်စစ်မှူးအနေဖြင့် ကြီးမားသော ဆုံးဖြတ်ချက် ချမှတ်ရမှာ ဖြစ်ပါတယ်။