ဘရိုင်ယန် အမ်ဘိုမို ဟာ ဘရိုက်တန် ကို အနိုင်ရတဲ့ပွဲမှာ နှစ်ဂိုး သွင်းယူခဲ့သလို မက်သီယပ်စ် ကူညာ ကလည်း ဝုဗ် ကနေ နွေရာသီမှာ ပြောင်းရွှေ့လာပြီးနောက် ယူနိုက်တက် အတွက် ပထမဆုံးဂိုးကို သွင်းယူနိုင်ခဲ့ပါတယ်။ ယူနိုက်တက် ဟာ ကူညာ အတွက် ပေါင် ၆၂.၅ သန်း ပေးချေခဲ့ရပြီး အမ်ဘိုမို ကတော့ ဘရန့်ဖို့ဒ် ကနေ ပေါင် ၇၁ သန်းတန်တဲ့ ပြောင်းရွှေ့ကြေးနဲ့ ရောက်လာခဲ့တာ ဖြစ်ပါတယ်။

ယူနိုက်တက် ဂန္တဝင်ကစားသမားနဲ့ ဘောလုံးသုံးသပ်သူ နဗီးလ် က ပွဲအပြီးမှာ ကစားသမားနှစ်ဦးလုံးနဲ့ ပတ်သက်ပြီး ပြောဆိုခဲ့သလို၊ သူ့ရဲ့ ကလပ်ဟောင်း အတွက် "ပွဲပေါင်းများစွာ အနိုင်ရစေလိမ့်မယ်" လို့ ခန့်မှန်းခဲ့ပါတယ်။ "ကူညာ နဲ့ အမ်ဘိုမို တို့ကို ခေါ်ယူခြင်းရဲ့ စွန့်စားရမှုက ပြေပျောက်သွားခဲ့ပါတယ်။ ဘာလို့လဲဆိုတော့ သူတို့ဟာ ပရီးမီးယားလိဂ် မှာ အရင်က ကစားဖူးခဲ့သလို မတူညီတဲ့ အဆင့်မှာ စွမ်းဆောင်ရဖို့အတွက် ဆန္ဒပြင်းပြမှု ရှိနေလို့ပါ" လို့ နဗီးလ် က Sky Sports ကို ပြောပါတယ်။

"အမ်ဘိုမို က နေရာနဲ့ ကိုက်ညီပုံရတယ်။ သူ ဆန္ဒပြင်းပြ နေပုံရပြီး ဂိုးတွေ သွင်းယူချင်နေပုံရပါတယ်" "ယူနိုက်တက် မှာ ဆက်လက် တည်ဆောက်သွားဖို့ အရာတစ်ခု ရှိနေပါတယ်။ ကူညာ နဲ့ အမ်ဘိုမို တို့ဟာ ယူနိုက်တက် အတွက် ပွဲပေါင်းများစွာကို အနိုင်ရစေပါလိမ့်မယ်"

တစ်ချိန်တည်းမှာပဲ ဘောလုံးသုံးသပ်သူ ဂျေမီ ရပ်နက်ပ် ကတော့ ယူနိုက်တက် ဟာ ဒီရာသီ ပရီးမီးယားလိဂ် မှာ ထိပ်ဆုံး ငါးသင်း ဝင်နိုင်တယ်လို့ ပြောပါတယ်။ ယူနိုက်တက် ဟာ ၂၀၂၄-၂၅ ရာသီမှာ ရုန်းကန်ခဲ့ရပြီး အဆင့် ၁၅ ဖြင့် ရာသီသိမ်းခဲ့ပေမယ့် ဒီရာသီမှာတော့ ပိုမိုကောင်းမွန်တဲ့ အသင်း တစ်သင်းလို ဖြစ်နေပါတယ်။

"ကျွန်တော်တို့ သိပ်ပြီး အဆမတန် စိတ်လှုပ်ရှားလို့ မရပါဘူး။ ဒါပေမဲ့ ဒီအသင်း ထိပ်ဆုံး ငါးသင်း မဝင်နိုင်စရာ အကြောင်းမရှိပါဘူး"  "သူတို့မှာ အဲဒီလို အရည်အချင်းမျိုး သေချာပေါက် ရှိပါတယ်။ ဒါပေမဲ့ နည်းပြက ပြောခဲ့သလိုပဲ ထင်ယောင်ထင်မှား ဖြစ်နေမှာ မဟုတ်ပါဘူး။ အခြေအနေက တခြားဘက်ကိုလည်း လျင်မြန်စွာ ပြောင်းသွားနိုင်ပါတယ်" လို့ ရတ်ဒ်နပ်ပ် က သုံးသပ်ခဲ့ပါတယ်။

သူ့ရဲ့ ပထမဆုံး ယူနိုက်တက် ဂိုးအကြောင်း BBC နဲ့ ပြောဆိုရာမှာ ကူညာ က "အခု ဘာမှ ပြောဖို့ ခက်ပါတယ်။ ကျွန်တော် ဒါကို ရဖို့အတွက် အရမ်း ကြိုးစားခဲ့ရတာပါ" လို့ ပြောခဲ့ပါတယ်။ "ဒါက ဒီကလပ်ပါပဲ။ ဒီလို စွမ်းဆောင်ရည်မျိုးက သာမန်နဲ့ ပုံမှန် ဖြစ်နေဖို့ လိုအပ်ပါတယ်။ ဒီအသင်းရဲ့ တစ်စိတ်တစ်ပိုင်း ဖြစ်ရတာ အရမ်းကောင်းတယ်လို့ ခံစားရပါတယ်"

"အိုးလ်ထရက်ဖို့ဒ် မှာ ကျွန်တော့်ရဲ့ ပထမဆုံးဂိုးပါ။ ဒါကို ကျွန်တော် အိပ်မက်မက်ခဲ့ရတာပါ။ ဒါပေမဲ့ သေချာပါတယ်၊ အနိုင်ရတာက ပိုအရေးကြီးပါတယ်" "ဘာမှ ပြောဖို့ အရမ်းခက်ပါတယ်။ ကျွန်တော် ဘရိုင်ယန် အမ်ဘိုမို နဲ့ ဘင်ဂျမင် ဆက်စ်ကို တို့ကို နောက်ခဲ့ပါတယ်။ ကျွန်တော် ဂိုးသွင်းတဲ့ ခံစားချက်မျိုး လိုချင်တယ်လို့ ပြောခဲ့ပါတယ်"

"ဒီအသင်းရဲ့ တစ်စိတ်တစ်ပိုင်း ဖြစ်ရဖို့ အရမ်း စိတ်အားထက်သန် နေခဲ့ပါတယ်။ ကျွန်တော် ဂိုးသွင်းလိုက်တဲ့အခါ သူတို့က 'ကြည့်၊ မင်း အခု ပျော်လို့ရပြီ' လို့ ပြောခဲ့ကြတယ်။ ဒီအသင်းရဲ့ တစ်စိတ်တစ်ပိုင်း ဖြစ်ရတာ အရမ်းကောင်းတယ်လို့ ခံစားရပါတယ်" "ဒါက ကျွန်တော် ငယ်စဉ်ကတည်းက ကြည့်ရှုခဲ့တဲ့ ကလပ်ပါ။ ဒီမှာ ရှိနေရတာက ခံစားမှု အမျိုးမျိုး ရောနှောနေပါတယ်။ သူတို့ကို ကူညီပေးရတာက ကျွန်တော့်ရဲ့ အိပ်မက် အမှန်တကယ် ဖြစ်လာတာပါ" လို့ ပြောပါတယ်။