ပထမဆုံးအကြိမ် ဘော်လွန်းဒီအောဆုအတွက် အမည်စာရင်းတင်သွင်းခံခဲ့ရတဲ့ ဒမ်ဘီလီဟာ ဘာစီလိုနာအသင်းက လာမိုင်း ယာမားလ်ကို ကျော်ဖြတ်ပြီး ပီအက်စ်ဂျီအသင်းနဲ့ မယုံနိုင်စရာ ၁၂ လတာကာလ ဖြတ်သန်းခဲ့ပြီးနောက် ပြီးခဲ့တဲ့ အင်္ဂါနေ့က ပဲရစ်မြို့မှာ ကျင်းပခဲ့တဲ့ ဆုပေးပွဲအခမ်းအနားမှာ ဂုဏ်သိက္ခာရှိတဲ့ ဘော်လွန်းဒီအောဆုကို ရရှိသွားခဲ့ပါတယ်။

အသက် ၂၈ နှစ်အရွယ် တိုက်စစ်မှူးဟာ ပြီးခဲ့တဲ့ရာသီက သမိုင်းဝင်ရာသီတစ်လျှောက်လုံး ပီအက်စ်ဂျီအသင်း ဖလား ၄ လုံး ရရှိခဲ့ရာမှာ အဓိကအခန်းကဏ္ဍကနေ ပါဝင်ခဲ့ပါတယ်။ အဲဒီအောင်မြင်မှုတွေရဲ့ အထွတ်အထိပ်ကတော့ ချန်ပီယံလိဂ်ဖိုင်နယ်မှာ အင်တာမီလန်အသင်းကို အနိုင်ရရှိခဲ့တာပါပဲ။

လွန်ခဲ့တဲ့လတွေက ပြင်သစ်လိဂ် ၁ ရဲ့ တစ်ရာသီအကောင်းဆုံးကစားသမားနဲ့ ချန်ပီယံလိဂ်ရဲ့ တစ်ရာသီအကောင်းဆုံးကစားသမားအဖြစ်လည်း ရွေးချယ်ခံခဲ့ရတဲ့အပြင် ဒမ်ဘီလီကတော့ ပြင်သစ်မြို့တော်မှာ ကျင်းပခဲ့တဲ့ စိတ်ခံစားမှုအပြည့်အဝရှိတဲ့ မိန့်ခွန်းမှာ သူ့ရဲ့မိခင်ကို ကျေးဇူးတင်စကားပြောကြားချိန်မှာ မျက်ရည်တွေကျခဲ့ပါတယ်။

ဘော်လွန်းဒီအောဆုပေးပွဲကတော့ ဘယ်ကစားသမား ဆုရရှိသည်ဖြစ်စေ ပရိသတ်တွေ၊ ကျွမ်းကျင်သူတွေနဲ့ ကစားသမားတွေကြားမှာ အမြဲတမ်း ထင်မြင်ချက်တွေကွဲပြားနေခဲ့ပါတယ်။ ရီးရဲလ်မက်ဒရစ်အသင်းက ရိုဒရီ ဆုရရှိခဲ့တဲ့အတွက် ၂၀၂၄ ခုနှစ် ဆုပေးပွဲကို သပိတ်မှောက်ခဲ့ပါတယ်။

ဒီနှစ်မှာတော့ ယာမားလ်ရဲ့ဖခင်ကလည်း ဒမ်ဘီလီဆုရရှိတဲ့အပေါ် သူ့ရဲ့ခံစားချက်တွေကို ထုတ်ဖော်ပြောကြားခဲ့ပါတယ်။ သူ့ရဲ့သားဟာ ကမ္ဘာပေါ်မှာ “အကောင်းဆုံး” ကစားသမားဖြစ်ပြီး ဆုကို လက်ခံရရှိခဲ့သင့်တယ်လို့ အခိုင်အမာ ပြောကြားခဲ့ပါတယ်။

တစ်ဖက်မှာလည်း ဘာစီလိုနာနဲ့ ဘရာဇီး ဂန္တဝင် နေမာကတော့ ရာဖင်ညာရဲ့ အဆင့်သတ်မှတ်ချက်အပေါ် စိတ်ဆိုးဒေါသထွက်နေခဲ့ပါတယ်။ နူးကမ့်မှာ ဒုတိယရာသီ ခြေစွမ်းပြသခဲ့ပြီးနောက် သူ့ရဲ့တစ်နိုင်ငံတည်းသား ရာဖင်ညာဟာ ချီးကျူးခံရသင့်တယ်လို့ နေမာက ပြောကြားခဲ့ပါတယ်။

အမျိုးသား ဘောလုံးသမားတွေရဲ့ ထိပ်ဆုံးအဆင့် ၁၀ ခုကို ပြသခဲ့တဲ့ အကောင့်တစ်ခုရဲ့ ပို့စ်အောက်မှာ နေမာက မျက်ရည်ကျပြီးရယ်နေတဲ့ ရုပ်ပြောင်နဲ့အတူ “ရာဖင်ညာ အဆင့် ၅ မှာ ရှိနေတာ ရယ်စရာကောင်းလွန်းပါတယ်” လို့ မှတ်ချက်ပေးခဲ့ပါတယ်။

ပြီးခဲ့တဲ့ အင်္ဂါနေ့က ဆုပေးပွဲအခမ်းအနားမတိုင်ခင်မှာ ရာဖင်ညာက သူ့အနေနဲ့ ဘာစီလိုနာမှာ ထူးခြားတဲ့ရာသီကို ဖြတ်သန်းခဲ့ပြီးနောက် သူနဲ့ ယာမားလ်တို့ဟာ ဘော်လွန်းဒီအောဆုကို လက်ခံရရှိဖို့ “ထိုက်တန်တယ်” လို့ ပြောကြားခဲ့ပါတယ်။

“ကျွန်တော့်အမြင်အရ ကျွန်တော်တို့နှစ်ဦးစလုံး အများကြီးထိုက်တန်ပါတယ်၊ ဘော်လွန်းဒီအောဆုက ဘာစီလိုနာဆီရောက်လာခဲ့ရင် ကျွန်တော်တို့ အရမ်းပျော်ရွှင်မှာပါ” လို့ လိဒ်စ်အသင်းတိုက်စစ်မှူးဟောင်း ရာဖင်ညာက ပြောကြားခဲ့ပါတယ်။

“ကျွန်တော် ဆုရခဲ့ရင် ယာမားလ် အရမ်းပျော်ရွှင်မှာဖြစ်ပြီး ယာမားလ်ဆုရခဲ့ရင်လည်း ကျွန်တော် အရမ်းပျော်ရွှင်မှာပါ” “သူ ကစားခဲ့တဲ့ရာသီ၊ ကွင်းထဲမှာ သူလုပ်ဆောင်ခဲ့တာတွေနဲ့ သူ့ရဲ့မျက်လုံးထဲက ထူးခြားမှုတွေကြောင့် သူ အများကြီး ထိုက်တန်ပါတယ်” “ဒါပေမဲ့ ကျွန်တော် ဘာမှမသိပါဘူး၊ ကောလဟာလတွေတော့ရှိပါတယ်၊ ဒါပေမဲ့ ကျွန်တော်မသိပါဘူး” လို့ ရာဖင်ညာက ပြောကြားခဲ့ပါတယ်။

ရော်နယ်ဒင်ညိုဆီကနေ ဘော်လွန်းဒီအောဆုကို လက်ခံရရှိပြီးနောက် မျက်ရည်ကျခဲ့တဲ့ ဒမ်ဘီလီကတော့ သူ့ရဲ့အောင်မြင်မှုအတွက် အရေးပါတဲ့ အခန်းကဏ္ဍကနေ ပါဝင်ခဲ့တဲ့ အသင်းဖော်တွေနဲ့ မိသားစုကို ကျေးဇူးတင်စကားပြောကြားခဲ့ပါတယ်။

“ကျွန်တော် မငိုချင်ခဲ့ပါဘူး။ ဒါပေမဲ့ ကျွန်တော့်မိသားစု၊ ကျွန်တော့်အတွက် ရှိနေခဲ့တဲ့လူတွေအကြောင်း စပြောတာနဲ့ မျက်ရည်တွေကျလာခဲ့ပြီး မထိန်းနိုင်တော့ပါဘူး” လို့ ဒမ်ဘီလီက ပရိသတ်တွေကို ပြောကြားခဲ့ပါတယ်။ “ကျွန်တော် ကြုံတွေ့ခဲ့ရတာ ထူးခြားပါတယ်။ ကျွန်တော့်မှာ ဘာပြောစရာစကားမှ မရှိပါဘူး၊ ပီအက်စ်ဂျီနဲ့ ဖြစ်ပျက်ခဲ့တဲ့အရာတွေပေါ့”

“စိတ်ဖိစီးမှု နည်းနည်းခံစားရပါတယ်။ ဒီဆုကို ရဖို့ မလွယ်ပါဘူး။ ဘောလုံးလောကရဲ့ ဂန္တဝင် ရော်နယ်ဒင်ညိုကနေ ကျွန်တော့်ကို လက်ခံရရှိစေတာက ထူးခြားပါတယ်” လို့ ဒမ်ဘီလီက ပြောကြားခဲ့ပါတယ်။ “၂၀၂၃ ခုနှစ်မှာ ကျွန်တော့်ကို လာခေါ်ခဲ့တဲ့ ပီအက်စ်ဂျီအသင်းကို ကျေးဇူးတင်ချင်ပါတယ်။ ဒါက မယုံနိုင်စရာ မိသားစုတစ်ခုပါပဲ။ ဥက္ကဋ္ဌ နာဆာ အယ်လ်ခီလာဖီ က ကျွန်တော့်အတွက် ဖခင်တစ်ဦးလိုပါပဲ”

“ကျွန်တော်နဲ့အတူ ထူးခြားခဲ့တဲ့ ဝန်ထမ်းတွေနဲ့ နည်းပြကိုလည်း ကျေးဇူးတင်ချင်ပါတယ်။ သူလည်း ဖခင်တစ်ဦးလိုပါပဲ၊ ကျွန်တော့်ရဲ့ အသင်းဖော်တွေအားလုံးကိုလည်း ကျေးဇူးတင်ပါတယ်” “ကျွန်တော်တို့ လက်တွေ့မှာ အရာအားလုံးကို အတူတူရရှိခဲ့ကြပါတယ်။ ခက်ခဲတဲ့အချိန်တွေမှာ သင်တို့ ကျွန်တော့်ကို ပံ့ပိုးပေးခဲ့ပါတယ်။ ဒီတစ်ဦးချင်းဆုက အသင်းတစ်ခုလုံးက စုပေါင်းရရှိခဲ့တာပါ” လို့ ဒမ်ဘီလီက ပြောကြားခဲ့ပါတယ်။