ဂျူဗင်တပ်စ်အသင်းရဲ့ အဓိကကစားသမား ကီနန်ယေးလ်ဒစ်က ကလပ်အသင်းဂန္တဝင် အလက်ဆန်ဒရိုဒဲလ်ပီယာရိုနှင့် နှိုင်းယှဉ်မှုများ ရှိနေသော်လည်း သူ့ကိုယ်ပိုင်သမိုင်းကြောင်းကို တည်ဆောက်လိုပါတယ်လို့ ဆိုလိုက်ပါတယ်။အသက် ၁၉ နှစ်အရွယ်ကတည်းက ဂျူဗင်တပ်စ်တွင် ဂန္တဝင် နံပါတ် ၁၀ ဂျာစီကို စတင်ဝတ်ဆင်ခဲ့တဲ့ ယေးလ်ဒစ်က ကလပ်စံချိန်အဖြစ် ပွဲ ၇၀၅ ပွဲတွင် ၂၉၀ ဂိုး သွင်းယူပေးခဲ့တဲ့ သူ့ရဲ့ စံပြပုဂ္ဂိုလ်တစ်ဦးဖြစ်သူ ဒဲလ်ပီယာရိုထံမှ စိတ်ဓာတ်ခွန်အားယူရင်း တူရင်မြေတွင် သူ့ကိုယ်ပိုင်အမွေအနှစ်ကို ထွင်းထုချန်ထားခဲ့လိုနေပါတယ်။

ဂျူဗင်တပ်စ်အသင်းဟာ ၂၀၂၂ ခုနှစ်တွင် ဘိုင်ယန်မြူးနစ် လူငယ်အကယ်ဒမီမှ အလားအလာကောင်းတဲ့ ယေးလ်ဒစ်ကို ခေါ်ယူလိုက်စဉ်ကတည်းက သူတို့ ရတနာတစ်ပါးကို ရရှိလိုက်ပြီဖြစ်ကြောင်း သိရှိခဲ့ပါတယ်။ အီတလီရဲ့ တတိယတန်း စီးရီးရှိ ဂျူဗင်တပ်စ်လူငယ်အသင်း တွင် တစ်ရာသီဖြတ်သန်းပြီးနောက် ၂၀၂၃-၂၄ ရာသီမတိုင်မီတွင် သူ့ကို အသင်းကြီးသို့ ချက်ချင်းခေါ်ယူပေးခဲ့ပါတယ်။ ထိပ်တန်းအဆင့် ပွဲဦးထွက်ရာသီတွင် စီးရီးအေ ၂၇ ပွဲ ကစားပြီး နှစ်ဂိုးသာ သွင်းယူနိုင်ခဲ့သော်လည်း သူ့အသက်အရွယ်ကြားမှ ဂန္တဝင် နံပါတ် ၁၀ ရှပ်အင်္ကျီကို ရယူကာ ၂၀၂၄ ခုနှစ် သြဂုတ်လတွင် ငါးနှစ်စာချုပ်သစ် ချုပ်ဆိုနိုင်သည်အထိ လုံလောက်သော အလားအလာကို ပြသနိုင်ခဲ့ပါတယ်။ တူရကီကြယ်ပွင့်လေးဟာ ဖိအားများကြောင့် တုန်လှုပ်မသွားဘဲ ၂၀၂၄-၂၅ ရာသီတွင် ၅၂ ပွဲ ကစားပြီး ၁၂ ဂိုး သွင်းယူနိုင်ခဲ့ပါတယ်။ ဒါဟာ ဂျူဗင်တပ်စ်အတွက် ညံ့ဖျင်းလှသည့် ရာသီတစ်ခုတွင် တစ်ဦးတည်း ထွန်းလင်းတောက်ပနေတဲ့ ကြယ်ပွင့်တစ်ဦး ဖြစ်ခဲ့ပါတယ်။

ယူအီးအက်ဖ်အေ နှင့် အင်တာဗျူးတစ်ခုတွင် ဂျူဗင်တပ်စ်ရဲ့ နာမည်ကျော် နံပါတ် ၁၀ ဂျာစီကို ဝတ်ဆင်ရသည့် ဖိအားအကြောင်း မေးမြန်းရာ ယေးလ်ဒစ်က "ပထမတော့ ကျွန်တော်တွေးမိတယ် 'အိုး ဘုရားသခင်၊ နံပါတ် ၁၀ နဲ့ ကျွန်တော် လုပ်နိုင်ပါ့မလား' ပေါ့။ ဒါပေမဲ့ အဲ့ဒီနောက်မှာတော့ ကျွန်တော် ဒါကို သိပ်ပြီး တွေးမနေတော့ပါဘူး။ ကျွန်တော် ဒီနံပါတ်ကို ရိုးရိုးရှင်းရှင်းပဲ လိုချင်ခဲ့တာ၊ တောက်ပချင်တယ်၊ ပျော်ရွှင်ချင်တယ်။ ပြီးတော့ ရိုးရိုးသာသားပြောရရင် နံပါတ်က အရေးမပါပါဘူး၊ ကျွန်တော်ကသာ ကစားတာပါ။ ဒါကြောင့် ကျွန်တော် အမြဲတမ်း အစွမ်းကုန်ကြိုးစားပြီး ဘာတွေလုပ်နိုင်လဲဆိုတာကို ပြသချင်ပါတယ်။ အခုအချိန်ထိတော့ အဆင်ပြေခဲ့တယ်လို့ မျှော်လင့်ပြီး ဒီအတိုင်းပဲ ဆက်သွားချင်ပါတယ်" လို့ ပြောပါတယ်။

သူ၏ စံပြပုဂ္ဂိုလ်တစ်ဦးဖြစ်သူ ဒဲလ်ပီယာရိုနှင့် နှိုင်းယှဉ်မှုများနှင့် ပတ်သက်၍ ယေးလ်ဒစ်က ဂန္တဝင်အီတလီကစားသမားကြီးဟာ ကျွန်တော် အမြဲလေးစားအားကျခဲ့ရသူတွေထဲက တစ်ဦး ဖြစ်သော်လည်း သူက သူ့ကိုယ်ပိုင်သမိုင်းကြောင်းကို တည်ဆောက်ချင်တယ်လို့ ပြောကြားခဲ့ပါတယ်။

"ဒဲလ်ပီယာရိုနဲ့ နှိုင်းယှဉ်ခံရတာက အံ့ဩစရာကောင်းတဲ့ ခံစားချက်တစ်ခုပါပဲ။ နံပါတ် ၁၀ ရှပ်အင်္ကျီက ကလေးတိုင်းရဲ့ အိပ်မက်ဖြစ်ပြီး အခု ကျွန်တော်က ဒီလိုကလပ်အသင်းကြီးမှာ အဲ့ဒီဂျာစီကို ဝတ်ဆင်နေရပါပြီ။ ကျွန်တော်က သူနဲ့ကျွန်တော့်ကို နှိုင်းယှဉ်တာတွေ မကြိုက်ဘူးလို့ အမြဲပြောပါတယ်၊ ဘာဖြစ်လို့လဲဆိုတော့ သူက ဂန္တဝင်တစ်ယောက်ပါ၊ သူက သူ့ရဲ့ကစားသမားဘဝကို အဆုံးသတ်သွားပြီ၊ ကျွန်တော်ကတော့ အခုမှ စတင်နေတုန်းပဲ ရှိပါသေးတယ်။ ကျွန်တော့်ကိုယ်ပိုင်သမိုင်းကြောင်းကို တည်ဆောက်ချင်ပါတယ်။ ဒါပေမဲ့ ဟုတ်ပါတယ်၊ သူက ကျွန်တော် အမြဲလေးစားအားကျခဲ့ရသူတွေထဲက တစ်ဦးဖြစ်ပြီး အခု ဒီကလပ်မှာ သူ့ရဲ့ဂျာစီကို ဝတ်ဆင်ခွင့်ရတဲ့အတွက် ဂုဏ်ယူမိပါတယ်" လို့ ပြောပါတယ်။

ယေးလ်ဒစ်ဟာ အီတလီရဲ့ အတောက်ပဆုံး တိုက်စစ်ကြယ်ပွင့်များထဲမှ တစ်ဦးအဖြစ် ပေါ်ထွက်လာခဲ့သလို ကမ္ဘာ့အကောင်းဆုံး လူငယ်ကစားသမားများထဲမှ တစ်ဦးအဖြစ်လည်း ချီးကျူးခံနေရပါတယ်။ ဂျူဗင်တပ်စ် ဂန္တဝင်တစ်ဦးဖြစ်တဲ့ အလက်ဆန်ဒရိုဒဲလ်ပီယာရို ဝတ်ဆင်ခဲ့တဲ့ နံပါတ် ၁၀ ဂျာစီကို ဆက်ခံခြင်းက အသက် ၂၀ အရွယ် ကစားသမားရဲ့ ပခုံးပေါ်တွင် မျှော်လင့်ချက်များ ပိုမိုဖိစီးစေခဲ့ပါတယ်။ သို့သော် ဒဲလ်ပီယာရိုကမူ ဒီလူငယ်ကစားသမားက လမ်းကြောင်းမှန်ပေါ်တွင် ရှိနေပြီး သူ့ထံမှ မည်သည့်အကြံဉာဏ်မျှ မလိုအပ်ဟု ယုံကြည်နေပါတယ်။

"ယေးလ်ဒစ်ကို ကျွန်တော်နဲ့ နှိုင်းယှဉ်ကြတာကို ကျွန်တော်ကြိုက်ပါတယ်။ ဟုတ်ပါတယ်၊ ကျွန်တော် ကြိုက်ပါတယ်" ဟု အီတလီလက်ရွေးစင်ဟောင်းက ပြီးခဲ့သည့်လက ဂျူဗင်တပ်စ်နှင့် အတ္တလန်တာတို့ ၁-၁ ဂိုး သရေကျခဲ့သည့်ပွဲမတိုင်မီ CBS Sports Golazo အတွက် ကွင်းဘေးတင်ဆက်သူအဖြစ် ပြောကြားခဲ့ပါတယ်။

"ဆိုလိုတာက သူ့အတွက် ကျွန်တော် ဝမ်းသာပါတယ်။ ကီနန်က စိတ်ဓာတ်ပိုင်းဆိုင်ရာ၊ ပွဲကိုချဉ်းကပ်ပုံနဲ့ တစ်ပတ်တာအတွင်း စွမ်းဆောင်ရည်ပြသပုံတွေအရ အရမ်းကောင်းတဲ့ လူငယ်တစ်ယောက်ပါ။ သူက အသင်းကိုကူညီဖို့အတွက် ပြေးလွှားရတာတွေ၊ စွန့်လွှတ်အနစ်နာခံမှုတွေ အများကြီး လုပ်ပါတယ်။ ဒါက အရမ်းအရေးကြီးပါတယ်။ အသင်းဖော်တွေအနေနဲ့ ခင်ဗျားရဲ့အသင်းဖော်တွေက ခင်ဗျားအတွက် ကွင်းထဲမှာ အသေခံကစားပေးတာကို လိုချင်ကြမှာပါ"

"ဒါ့အပြင် သူက အခု ဂိုးတွေ ပိုပိုပြီး ဖန်တီးလာနိုင်ပါပြီ။ တခြားအခွင့်အရေးတွေမှာလည်း လှပတဲ့ဂိုးတွေ သွင်းယူနိုင်ခဲ့သလို ဂိုးဖန်တီးမှုတွေလည်း လုပ်နိုင်ခဲ့တယ်။ သူက ပြီးပြည့်စုံတဲ့ ကစားသမားတစ်ယောက်၊ ပြီးပြည့်စုံတဲ့ နံပါတ် ၁၀ တစ်ယောက် ဖြစ်လာနေပါပြီ။ ဒါက သူ့အတွက်ရော ဂျူဗင်တပ်စ်အတွက်ပါ အရမ်းကောင်းပါတယ်"

"သူက ဆယ်ကျော်သက်အရွယ်နဲ့ နံပါတ် ၁၀ ကို ယူခဲ့တယ်ဆိုတဲ့အချက်က သူ့ရဲ့ပင်ကိုယ်စရိုက်ပိုင်းနဲ့ ပတ်သက်ပြီး အဓိပ္ပာယ်အများကြီး ရှိပါတယ်။ ဒါက သူ့အတွက် အပေါင်းလက္ခဏာဆောင်တဲ့ အချက်တစ်ချက်ပါ။ ဒုတိယအချက်ကတော့ ဒါက ဘာကို အဓိပ္ပာယ်ဆောင်သလဲ ဆိုတာပါပဲ။ ဒါက အရာများစွာကို အဓိပ္ပာယ်ဆောင်ပါတယ်။ ခင်ဗျားက ဂျူဗင်တပ်စ်ဂျာစီနဲ့ ထိုက်တန်တယ်ဆိုတာကို နေ့တိုင်း သက်သေပြဖို့ လိုအပ်ပါတယ်။ ဒါက အဓိကသော့ချက်ပါပဲ။ သူ့ရဲ့ခရီးလမ်းအတွက် ကျွန်တော် ဝမ်းသာပါတယ်။ သူက အခြေအနေတိုင်းမှာ အကောင်းဆုံးဖြစ်ကြောင်း ပြသနေတဲ့အတွက် ကျွန်တော် ဝမ်းသာပါတယ်။ နေ့တိုင်း ဒီလိုလုပ်ဆောင်ရခြင်းရဲ့ အရေးပါပုံကို သူ သိပါတယ်" လို့ ပြောခဲ့ပါတယ်။

ယခုလအစောပိုင်းတွင် La Gazzetta dello Sport နှင့် ပြုလုပ်ခဲ့တဲ့ နောက်ထပ်အင်တာဗျူးတစ်ခုတွင်လည်း သူက တူရကီလက်ရွေးစင်ကစားသမားကို ပိုမိုချီးကျူးခဲ့ပါသေးသည်။ "ကျွန်တော် အခုထိ မြင်တွေ့ခဲ့ရသလောက်တော့ သူ အကြံဉာဏ်မလိုအပ်ပါဘူး။ သူက အလုပ်ကြိုးစားရတာကို နှစ်သက်ပြီး ဒီကလပ်ရဲ့ သရုပ်ပြယုဂ်တစ်ခု ဖြစ်လာချင်တဲ့၊ အောင်မြင်ချင်တဲ့ လေးလေးနက်နက်ရှိတဲ့ ကလေးတစ်ယောက်ပါ"

"ကျွန်တော့်အမြင်မှာတော့ သူက အကောင်းဆုံးနည်းလမ်းနဲ့ ဒါကို လုပ်ဆောင်နေပါတယ်။ ဟုတ်ပါတယ်၊ ခက်ခဲတဲ့ အခိုက်အတန့်တွေ၊ အတက်အကျတွေ ရှိလာမှာဖြစ်ပြီး အဲ့ဒီအချိန်တွေမှာ သူက မှန်ကန်တဲ့လူတွေအပေါ် အားကိုးဖို့ လိုအပ်ပါလိမ့်မယ်။ သူ့ပတ်ဝန်းကျင်မှာ အချိန်အခါသင့်မှာ သူကြားသင့်ကြားထိုက်တာတွေကို ပြောပြနိုင်မယ့် မှန်ကန်တဲ့လူတွေ အမြဲရှိနေဖို့ပဲ ကျွန်တော် မျှော်လင့်ပါတယ်" လို့ သူကပြောပါတယ်။

ယခုရာသီ ၈ ပွဲအတွင်း ၂ ဂိုးသွင်း၊ ၄ ကြိမ် ဂိုးဖန်တီးမှု ပြုလုပ်ထားတဲ့ ယေးလ်ဒစ်က တိုက်စစ်ပိုင်းတာဝန်အများစုကို ထမ်းပိုးထားနေရပါတယ်။ သို့သော် သူ့ရဲ့စွမ်းဆောင်ရည်တစ်ခုတည်းက လုံလောက်ခြင်းမရှိသေးပါဘူး။ Old Lady ဟာ  လက်ရှိတွင် နောက်ဆုံး ၆ ပွဲဆက်တိုက် နိုင်ပွဲပျောက်ဆုံးထားပြီး ခြေစွမ်းကျဆင်းမှုနှင့် ကြုံတွေ့နေရပါတယ်။ လက်ရှိ ဇယားအဆင့် ၇ နေရာတွင် ရုန်းကန်နေရတဲ့ အသင်းဟာ လိဂ်ထိပ်ဆုံးမှ အေစီမီလန်အသင်းနှင့် လေးမှတ်သာ ကွာဟနေပါတယ်။ စကူဒက်တိုဆုကို စိန်ခေါ်ရန် ရည်မှန်းထားတဲ့ ကလပ်အသင်းရဲ့ ကံကြမ္မာကို ပြန်လည်ကောင်းမွန်လာစေရန်အတွက် ယေးလ်ဒစ်က အဓိကကျသူ ဖြစ်လာပါလိမ့်မယ်။

၂၀၂၉ ခုနှစ်အထိ ကလပ်အသင်းနှင့် စာချုပ်ရှိနေသော်လည်း ကလပ်ရှိသူ့ရဲ့အနာဂတ်ဟာ မီဒီယာများကြားတွင် အမြဲတမ်း ငြင်းခုံဆွေးနွေးစရာ ဖြစ်နေပါတယ်။ အာဆင်နယ်၊ ချဲလ်ဆီးနှင့် ယူနိုက်တက်တို့ကဲ့သို့ ပရီးမီးယားလိဂ်အသင်းကြီးများက ဒီဘယ်တောင်ပံကစားသမားကို ခေါ်ယူရန် စိတ်ဝင်စားမှု ပြင်းပြင်းထန်ထန် ပြသထားသော်လည်း တူရင်အခြေစိုက် အင်အားကြီးအသင်းကမူ ယေးလ်ဒစ်ရဲ့ ရေရှည်အနာဂတ်ကို အာမခံနိုင်ရန်နှင့် လာမည့်နှစ်များတွင် ကလပ်အသင်းရဲ့ ဂုဏ်သိက္ခာဟောင်းကို ပြန်လည်ရရှိအောင် သူက ကူညီပေးနိုင်ရန်အတွက် အသေးစိတ်ကျတဲ့ နှစ်နှစ်တာစီမံကိန်းတစ်ခုကို ရေးဆွဲထားပါတယ်။