လက်မှတ်ထိုးချင်းနဲ့ပတ်သက်ပြီး စာချုပ်ချုပ်ဆိုတော့မှာဖြစ်တာကြောင့် ပရိသတ်တွေအနေနဲ့ ဘာစီလိုနာစတား ယာမဲလ်ရဲ့လက်မှတ်လိုချင်တယ်ဆိုရင် ငွေကြေးပေးဆောင်ရတော့မှာဖြစ်ပါတယ်။ ယာမဲလ်တစ်ယောက် ဖရီးလက်မှတ်ထိုးပေးခြင်းကို ရပ်တန့်တော့မှာဖြစ်ပြီး စာချုပ်ချုပ်ဆိုတာက ရောင်းကုန်တစ်ခုအနေနဲ့ လုပ်ဆောင်တော့မှာဖြစ်ပါတယ်။ မန်ဒိုသတင်းဌာနရဲ့အဆိုအရ အသက် ၁၈ နှစ်သားရဲ့တာဝန်ရှိသူတွေဟာ ဈေးကွက်ထဲမှာ ယာမဲလ်ရဲ့လက်မှတ်ကို တန်ကြေးတစ်ခုသတ်မှတ်ဖို့ ပြင်ဆင်နေတယ်လို့ သိရပါတယ်။

အဆိုပါဆုံးဖြတ်ချက်ကို ယာမဲလ်ရဲ့အကြံပေးအေဂျင်စီက အခြားကမ္ဘာကျော်စတားတွေနည်တး ဈေးကွက်ရှာဖွေရေးကျွမ်းကျင်သူတွေနဲ့တိုင်ပင်ညှိနှိုင်းခဲ့တာဖြစ်ပါတယ်။ စာချုပ်ချုပ်ဆိုပြီးသွားရင် ပရိသတ်တွေအနေနဲ့ ဘာစီလိုနာစတားရဲ့လက်မှတ်ထိုးထားတဲ့အကျီ ၊ ဖိနပ် နဲ့ အခြားထုတ်ကုန်တွေကို ဝယ်ယူနိုင်တော့မှာဖြစ်ပါတယ်။ ဘာစီလိုနာအသင်းဘက်ကတော့ ယာမဲလ်ရဲ့အဆိုပါလုပ်ရပ်ဟာ သာမန်ဖြစ်ရပ်တစ်ခုလို့သာ တုံ့ပြန်ခဲ့ပါတယ်။ အသင်းဘက်က မန်ဒိုသတင်းဌာနရဲ့ဖော်ပြချက်နဲ့ပတ်သက်ပြီး ကမ္ဘာကျော်ဘောလုံးသမားတွေရဲ့ပရိုဖိုင်အတွက် သူတို့နားလည်တယ်လို့ ပြောကြားလိုက်ပါတယ်။

ယာမဲလ်ရဲ့တိုးတက်လာတဲ့စွမ်းဆောင်ရည်ကို အသင်းဘက်က သဘောကျနေပြီး စာချုပ်သက်တမ်းကလည်း ၂၀၃၁ အထိ ရှိနေပါတယ်။ အသက် ၁၈ နှစ်သားဟာ လက်ရှိမှာကမ္ဘာကျော်တံဆိပ်တွေဖြစ်တဲ့ Adidas / Beats / Powerade / Oppo / Konami / Nesquik တို့နဲ့လက်တွဲထားတာဖြစ်ပါတယ်။ တိုးတက်လာတဲ့စွမ်းဆောင်ရည်တွေနဲ့အတူ စပိန်သားဟာ Forbes မဂ္ဂဇင်းရဲ့ထိပ်တန်းလုပ်ခလစာအများဆုံး ၁၀ ယောက်စာရင်းမှာ ပထမဆုံးအကြိမ်ပါဝင်လာခဲ့ပါတယ်။ ယာမဲလ်ဟာ ဒီရာသီဘာစီလိုနာအတွက် လာလီဂါ ၄ ပွဲသာကစားထားရပေမယ့် ၂ ဂိုးသွင်း ၊ ၄ ဂိုးဖန်တီးထားနိုင်ခဲ့ပါတယ်။