မက်သီ တယ်လ်ဟာ ပြီးခဲ့တဲ့ရာသီက ဘိုင်ယန်မြူးနစ်ကနေ တော့တင်ဟမ်အသင်းဆီ အငှားနဲ့ ရောက်ရှိလာခဲ့ပြီး ဒီနွေရာသီမှာ ပေါင် ၃၅ သန်း (ဒေါ်လာ ၄၇ သန်း)နဲ့ အပြီးသတ်ပြောင်းရွှေ့ခဲ့ပါတယ်။ ဒါပေမဲ့ ပြင်သစ်သား တယ်လ်ဟာ ဒီရာသီ နည်းပြ သောမတ်စ် ဖရန့်ခ်ရဲ့အသင်းမှာ ခြေစွမ်းပြဖို့ ရုန်းကန်နေရပြီး နိုင်ငံတကာပွဲစဉ်တွေမတိုင်ခင် ပရီးမီးယားလိဂ်မှာ ၁၉ မိနစ်သာ ကစားခွင့်ရခဲ့ပါတယ်။

တယ်လ်ရဲ့အသင်းဖော်သစ် မိုဟာမက် ကူဒက်စ်ကတော့ နည်းပြ ဖရန့်ခ်အတွက် ပွဲဦးထွက် ၃ ပွဲမှာ ရွေးချယ်ခံခဲ့ရပြီး အပြောင်းအရွှေ့ဈေးကွက် နောက်ဆုံးနေ့မှာ ရန်ဒယ် ကိုလို မူအာနီ ရောက်ရှိလာတာကြောင့် အသက် ၂၀ အရွယ် ကစားသမားအတွက် တိုက်စစ်နေရာတွေမှာ ပြိုင်ဆိုင်မှု ပိုမိုပြင်းထန်လာခဲ့ပါတယ်။

တယ်လ်ဟာ တော့တင်ဟမ်အသင်းရဲ့ ချန်ပီယံလိဂ် လူစာရင်း ၂၂ ဦးထဲကနေ ချန်လှပ်ခံခဲ့ရတဲ့အတွက် အသင်းသစ်အတွက် သူ့ရဲ့ခြေစွမ်းပြခွင့်တွေ လျော့နည်းသွားခဲ့ပါတယ်။ ပြင်သစ် ယူ-၂၁ အသင်းနဲ့အတူ နိုင်ငံတကာပွဲကစားနေချိန်မှာ တယ်လ်က နည်းပြ ဖရန့်ခ်ရဲ့ ဆုံးဖြတ်ချက်ကို လေးစားကြောင်း ဝန်ခံပြောကြားခဲ့ပေမယ့် ချန်လှပ်ခံရမှုအတွက် စိတ်မကောင်းဖြစ်ခဲ့ရတယ်လို့ ဝန်ခံပြောကြားခဲ့ပါတယ်။

‘လူစာရင်းထဲမှာ မပါဝင်တဲ့အခါ စိတ်မကောင်းဖြစ်တယ်ဆိုတာ ရှင်းပါတယ်။ ဒါပေမဲ့ ကျွန်တော်က အခြေအနေတိုင်းမှာ အကောင်းမြင်တဲ့သူတစ်ယောက်ပါပဲ။ ဘာလို့လဲဆိုတော့ ကျွန်တော် စိတ်ပိုင်းဆိုင်ရာကို အများကြီး အလုပ်လုပ်ခဲ့လို့ပါ’ ‘ဒီနေ့တော့ စိတ်ပျက်မိပါတယ်။ ကျွန်တော်လည်း အဲဒီနေရာမှာ ရှိချင်ပါတယ်။ ဒါပေမဲ့ နည်းပြရဲ့ရွေးချယ်မှုဟာ နည်းပြရဲ့ရွေးချယ်မှုပါပဲ။ ကျွန်တော်တို့အနေနဲ့ အဲဒီရွေးချယ်မှု ကို လေးစားရပါမယ်။ အကောင်းဆုံးပုံစံနဲ့ ပြန်လာနိုင်ဖို့ ကြိုးစားရပါလိမ့်မယ်’ လို့ သူက ပြောပါတယ်။

တယ်လ်ကတော့ လူစာရင်းကနေ ချန်လှပ်ခံရမှုကနေ နည်းပြ ဖရန့်ခ်ရဲ့ ပွဲထွက်လူစာရင်းထဲ ဝင်ရောက်နိုင်ဖို့အတွက် စိတ်ဓာတ်ခွန်အားတစ်ခုအဖြစ် အသုံးချချင်တယ်လို့ မျှော်လင့်နေပါတယ်။ ကစားခွင့်ရဖို့အတွက် အသင်းပြောင်းရွှေ့ဖို့ ဆန္ဒမရှိဘူးလို့လည်း အခိုင်အမာ ပြောကြားခဲ့ပါတယ်။

‘ကျွန်တော် လူစာရင်းထဲမှာ ပါဝင်သည်ဖြစ်စေ၊ မပါသည်ဖြစ်စေ ဂရုမစိုက်ပါဘူး။ ကျွန်တော်မှာ ဒီရာသီမှာ လက်စားချေဖို့၊ အကျိုးရှိအောင် ကစားနိုင်ဖို့နဲ့ ပရီးမီးယားလိဂ်မှာ ကျွန်တော့်ရဲ့ရာသီကို အစပျိုးနိုင်ဖို့ ဆန္ဒရှိပါတယ်။ ဒါက ကျွန်တော့်ရဲ့ ပထမဆုံးရာသီရဲ့ အစဖြစ်ပြီး၊ ပြီးခဲ့တဲ့နှစ်ကတော့ ၆ လအငှားစာချုပ်ပဲ ဖြစ်ခဲ့ပါတယ်’

‘တခြားနေရာကို သွားချင်တဲ့ ဆန္ဒရှိလား။ ကျွန်တော် တော့တင်ဟမ်နဲ့ စာချုပ်ချုပ်ဆိုထားတာကြောင့် တော့တင်ဟမ်ကစားသမားတစ်ဦးဖြစ်ပြီး၊ ရိုးရိုးလေးပြောရရင် ကစားခွင့်ရဖို့ အကောင်းဆုံးကြိုးစားသွားမှာပါ’ လို့ တယ်လ်က ထပ်ပြောခဲ့ပါတယ်။