နယူးကာဆယ်ကို ၃-၂ ဂိုးဖြင့် အံ့အားသင့်ဖွယ်အနိုင်ယူခဲ့တဲ့ပွဲစဉ်မှာ ပရီးမီးယားလိဂ်ချန်ပီယံတွေအတွက် အနိုင်ဂိုးသွင်းယူပြီးနောက် အသက်-၁၆ နှစ်အရွယ်ကစားသမားအန်ဂူမိုဟာအတွက် အလုပ်တွေ ပြင်းပြင်းထန်ထန်ကြိုးစားဖို့ စတင်လာရုံသာရှိသေးတယ်လို့ လီဗာပူးကပ္ပတိန်ဗန်ဒိုက်က ပြောကြားခဲ့ပါတယ်။

ရူးသွပ်လောက်စရာ စိန့်ဂျိမ်းစ်ပတ်ခ်ကွင်းပွဲစဉ်မှာ ပွဲချိန် ၁၀၀ မိနစ်အနိုင်ဂိုးကို သွင်းယူဖို့ အရန်ခုံတန်းမှ ထလာခဲ့တဲ့ အန်ဂူမိုဟာက ကလပ်အသင်းသမိုင်းတလျှောက် ပွဲဦးထွက်မှာ ဂိုးသွင်းယူနိုင်တဲ့ အသက်အငယ်ဆုံးကစားသမား ဖြစ်လာခဲ့ပါတယ်။

ဗန်ဒိုက်က “ အန်ဂူမိုဟာအတွက် အိပ်မက်ဆန်ဆန်ပွဲဦးထွက်ပွဲစဉ်တစ်ခု ဖြစ်ခဲ့ပါတယ်။ အန်ဂူမိုဟာအတွက် ကျွန်တော် အလွန်ကျေနပ်အားရမိပါတယ်။ အရင်တုန်းကလည်း ကျွန်တော်က သူ့ကို အခုမှအစသာရှိသေးပြီး အလုပ်ကို ပြင်းပြင်းထန်ထန်ကြိုးစားဖို့နဲ့ မာန်မာနမထောင်လွှားဖို့ လိုအပ်တယ်ဆိုတာ ရှင်းပြခဲ့ပါတယ်။ ဒါပေမဲ့ အခုလိုညမျိုးတွေကြောင့် ဒီပျော်ရွှင်မှုကိုခံစားဖို့လည်း လိုအပ်တယ်ဆိုတာ အငြင်းပွားစရာမရှိပါဘူး။

မနက်ဖြန်မှာတော့ ကောင်လေးကိုယ်တိုင် ကျွန်တော်တို့နဲ့အတူ ခက်ခဲတဲ့လေ့ကျင့်ခန်းတွေလုပ်ဆောင်ဖို့ ပြန်ရောက်ရှိလာမယ်ဆိုတာ သေချာပါတယ်”လို့ ပြောပါတယ်။ ဆက်လက်ပြီး ဗန်ဒိုက်က အီဆက်ခ်ရဲ့အပြောင်းအရွှေ့နဲ့ပတ်သက်လို့ ကလပ်အသင်းနှစ်ခုအကြား ထိပ်တိုက်ရင်ဆိုင်မှုတွေကြောင့် စိန့်ဂျိမ်းစ်ပတ်ခ်ကို လောင်စာထည့်ပေးလိုက်သလို ဖြစ်သွားတယ်လို့ ပြောခဲ့ပါတယ်။

ဒတ်ချ်နောက်ခံလူက “ ဒီကွင်းဆီ သွားရောက်ယှဉ်ပြိုင်ကစားရတာ ခက်ခဲတယ်ဆိုတာ ကျွန်တော်တို့အားလုံး သိပါတယ်။ နယူးကာဆယ်ကို အစွမ်းကုန်တောက်လောင်နေဖို့ အခုသီတင်းပတ်အတွင်း လောင်စာတွေ အများကြီးထည့်သွင်းခဲ့တယ်ဆိုတာ ကျွန်တော်တို့ သိထားပါတယ်။

ဒီညမှာဖြစ်ပျက်ခဲ့တဲ့အရာတွေကို မျှော်လင့်ထားခဲ့ပြီးသားပါ။ ကျွန်တော်တို့အတွက် စိတ်ပျက်စရာကို ပြောရမယ်ဆိုရင် အလွတ်တည်ကန်ဘောမှတဆင့် နှစ်ဂိုးပေးလိုက်ရခြင်းပါပဲ။ ဒါမျိုးမဖြစ်သင့်ပေမယ့် ခြုံပြီးပြောရရင်တော့ ကောင်းမွန်လှတဲ့ အနိုင်သုံးမှတ် ဖြစ်ပါတယ်”လို့ ဆိုပါတယ်။