လီဗာပူးအသင်းခေါင်းဆောင် ဗာဂျီလ်ဗန်ဒိုက်က ထရန့် အလက်ဇန္ဒား-အာနိုးလ်ဟာ လွန်ခဲ့တဲ့ ၉ နှစ်တာကာလအတွင်း အသင်းအတွက် သူ့ရဲ့ဆောင်ရွက်မှုတွေကြောင့် ပရိသတ်တွေရဲ့ လေးစားမှုကို ခံယူထိုက်သူလို့ ယုံကြည်နေပါတယ်။ အလက်ဇန္ဒား-အာနိုးလ်ဟာ ၂၀၁၆ ခုနှစ်မှာ လီဗာပူးရဲ့ လူငယ်အကယ်ဒမီကနေ အသင်းကြီးသို့ရောက်လာပြီးကတည်းက ရင်သပ်ရှုမောဖွယ် ခြေစွမ်းတွေ ပြသခဲ့သူဖြစ်ကာ ဂျာဂျင်ကလော့ပ်ရဲ့ အန်ဖီးလ်က အောင်မြင်မှုတွေမှာ အဓိကကျတဲ့ ကစားသမားတစ်ဦးလည်း ဖြစ်ပါတယ်။

အဆိုပါ နောက်ခံလူဟာ တနင်္ဂနွေနေ့က လက်စတာစီးတီးကို အနိုင်ရရှိခဲ့တဲ့ပွဲမှာ ဒဏ်ရာကနေ ပြန်ကောင်းလာပြီး အနိုင်ဂိုးသွင်းယူပေးခဲ့တာကြောင့် လီဗာပူးအသင်းဟာ ပရီးမီးယားလိဂ်ချန်ပီယံဆုကို ရယူဖို့ တစ်လှမ်းနီးကပ်သွားခဲ့ပါတယ်။ အလက်ဇန္ဒား-အာနိုးလ်ဟာ နွေရာသီမှာ ရီးရဲလ်မက်ဒရစ်ကို အလွတ်ပြောင်းရွှေ့ကြေးနဲ့ ပြောင်းရွှေ့နိုင်တယ်ဆိုတဲ့ သတင်းတွေကြားမှာ ပရိသတ်တချို့ရဲ့ ဝေဖန်မှုတွေကို ခံခဲ့ရပါတယ်။

ပြီးခဲ့တဲ့အပတ်က လီဗာပူးနဲ့ စာချုပ်သစ်ချုပ်ဆိုခဲ့တဲ့ ဗန်ဒိုက်က အဲဒီအခြေအနေကို ဖြေရှင်းရမယ်ဆိုတာကို ဝန်ခံခဲ့ပေမယ့် ပရိသတ်တွေထံ အလက်ဇန္ဒား-အာနိုးလ်ကို ချစ်ခင်ပေးဖို့ တောင်းဆိုခဲ့ပါတယ်။ “သူ့အတွက် အနာဂတ်မှာ ဘာတွေဖြစ်လာမလဲဆိုတာက သူကိုယ်တိုင်နဲ့ သူ့မိသားစုနဲ့ ဖြေရှင်းရမယ့်ကိစ္စပါ။ ဒါပေမဲ့ သူဟာ ဒီအချိန်မှာ လီဗာပူးကစားသမားဖြစ်ပြီး ကျွန်တော်တို့အသင်းအတွက် အရေးပါပါတယ်"

“သူဟာ တစ်ရာသီလုံးမှာ အရေးပါခဲ့ပြီး ဒီနေ့လည်း အချိန်ကြာစွာရရှိနေတဲ့ ဒဏ်ရာကနေ ပြန်လာခဲ့တာပါ။ အဲဒါကြောင့် ကျွန်တော် ပျော်ရွှင်မိပါတယ်" “ကျွန်တော် အသင်းကို ရောက်လာကတည်းက သူဟာ အံ့သြဖွယ်ကောင်းတဲ့ ကစားသမားတစ်ယောက်ဖြစ်ပြီး သူထွက်သွားဖို့ ဆုံးဖြတ်ခဲ့ရင်တောင် သူ့ကိုအမြဲတမ်း အမှတ်ရနေမယ့် ကောင်းမွန်တဲ့အရာတွေ အများကြီးရှိပါတယ်” လို့ ဗန်ဒိုက်က ပြောကြားခဲ့ပါတယ်။

အလက်ဇန္ဒား-အာနိုးလ်ဟာ ပရီးမီးယားလိဂ်မှာ ဂိုးဖန်တီးမှု ၆၄ ကြိမ် ပြုလုပ်ထားပြီး ဒါဟာ ပြိုင်ပွဲသမိုင်းတစ်လျှောက် အခြားသောဘယ်နောက်ခံလူတွေ ၅ ကြိမ်ပိုများပါတယ်။ သူ့ရဲ့ အသင်းဖော် အန်ဒရူး ရောဘတ်ဆန်က ၅၉ ကြိမ်နဲ့ ဒုတိယနေရာမှာ ရှိနေပါတယ်။ အင်္ဂလန်လက်ရွေးစင်ဟာ ပရီးမီးယားလိဂ်သမိုင်းတစ်လျှောက် နောက်ခံလူတွေထဲမှာ ဂိုးပါဝင်ပံ့ပိုးမှုအများဆုံးဖြစ်တဲ့ လေတန် ဘိန်းစ် (၈၅ ကြိမ်) ရဲ့နောက်မှာရှိနေတဲ့ အလက်ဇန္ဒား-အာနိုးလ်က ၈၂ ကြိမ်နဲ့ ရပ်တည်နေပါတယ်။

သူဟာ ၂၀၁၁ ခုနှစ်က မာတင် စကာတယ်လ်ပြီးနောက်ပိုင်း အရန်ခုံကနေ ဝင်လာပြီး လီဗာပူးအတွက် အနိုင်ဂိုးသွင်းယူပေးတဲ့ ပထမဆုံး နောက်ခံလူ ဖြစ်လာခဲ့ပြီး အသင်းက သူ့ကိုလိုအပ်တဲ့အချိန်တိုင်းမှာ ထပ်မံခြေစွမ်းပြခဲ့တဲ့ အလက်ဇန္ဒား-အာနိုးလ်ကို ဗန်ဒိုက်က ချီးကျူးခဲ့ပါတယ်။

နယ်သာလန်နိုင်ငံသားက “အဲဒီလို အရေးပါတဲ့ ဂိုးမျိုးသွင်းယူတဲ့အခါ အဲဒီအချိန်အခိုက်အတန့်မှာ ခြေစွမ်းပြပြီး အားလုံးကို ခံစားနိုင်ဖို့ သူ့ကို လက်ခုပ်သံတွေနဲ့ ချီးကျူးသင့်တယ်လို့ ကျွန်တော်ထင်ပါတယ်။ ဘာလို့လဲဆိုတော့ သူ အသင်းမှာ ဆက်နေသည်ဖြစ်စေ ထွက်သွားသည်ဖြစ်စေ တနင်္ဂနွေနေ့မှာ အပြီးသတ်နိုင်ဖို့ ကျွန်တော်တို့အသင်းကို အခွင့်အရေးပေးခဲ့တဲ့ ဒီလိုအချိန်အခိုက်အတန့်တွေကို လျှော့မတွက်သင့်ပါဘူး"

“သူဟာ အဲဒီအခိုက်အတန့်ကို ခံစားထိုက်တယ်လို့ ကျွန်တော်ထင်ပြီး အခုတော့ အလုပ်ပြန်လုပ်ပြီး နောက်ထပ်ပွဲစဉ်တွေအတွက် အဆင်သင့်ဖြစ်နေရပါမယ်” လို့ ပြောကြားခဲ့ပါတယ်။လက်စတာနဲ့ပွဲက အလက်ဇန္ဒား-အာနိုးလ်ရဲ့ ဂိုးဟာ သူ့ရဲ့ ဘယ်ခြေနဲ့ ပထမဆုံးသွင်းယူခဲ့တဲ့ ဂိုးဖြစ်ပါတယ်။ သူ့ရဲ့ ကစားသမားဘဝမှာ အရင်သွင်းယူခဲ့တဲ့ ၂၂ ဂိုးစလုံးဟာ သူ့ရဲ့ အားသာတဲ့ ညာခြေနဲ့ သွင်းယူခဲ့တာဖြစ်ပါတယ်။လီဗာပူးအသင်းဟာ လာမယ့် တနင်္ဂနွေနေ့ အိမ်ကွင်းမှာ တော့တင်ဟမ်ကို အနိုင်ရရှိခဲ့ရင် ချန်ပီယံဆုကို သေချာပေါက် ဆွတ်ခူးနိုင်မှာဖြစ်ပြီး အာဆင်နယ်အသင်းကသာ ခရစ္စတယ်ပဲလေ့စ်ကို ရှုံးနိမ့်ခဲ့ရင် ပိုစောပြီးလည်း ချန်ပီယံဖြစ်နိုင်ပါတယ်။