မန်ချက်စတာ စီးတီး နည်းပြ ပက် ဂွါဒီယိုလာဟာ အာဆင်နယ်အသင်းနဲ့ ရင်ဆိုင်ရမယ့် ကာရာဘောင် ဖလား ဗိုလ်လုပွဲမှာ အသစ်ခေါ်ယူထားတဲ့ နောက်ခံလူ မာ့ခ် ဂူဟီ ကို ထည့်သွင်း အသုံးပြုခွင့်ရရှိဖို့အတွက် ပြိုင်ပွဲ စည်းမျဉ်းတွေကို ပြောင်းလဲပေးရန် ကြိုးပမ်းသွားမှာ ဖြစ်ပါတယ်။

အင်္ဂလန် လက်ရွေးစင် နောက်ခံလူ မာ့ခ် ဂူဟီ ဟာ မကြာသေးမီကမှ ခရစ္စတယ် ပဲလေ့စ် အသင်းကနေ မန်ချက်စတာ စီးတီးကို ပြောင်းရွှေ့လာခဲ့သူ ဖြစ်ပါတယ်။ သူဟာ ဒီရာသီမှာ ပဲလေ့စ် အသင်းအတွက် ကာရာဘောင် ဖလား ပြိုင်ပွဲမှာ ပါဝင်ကစားပေးခဲ့တာကြောင့် စည်းမျဉ်းအရ မန်စီးတီး အသင်းနဲ့အတူ ဒီပြိုင်ပွဲမှာ ဆက်လက် ကစားခွင့် မရှိတော့တာပါ။

ထူးခြားချက်အနေနဲ့ မာ့ခ် ဂူဟီ ဟာ ပြီးခဲ့တဲ့ ဒီဇင်ဘာလအတွင်းက အီးမရိတ်စ် အားကစားကွင်းမှာ ကစားခဲ့တဲ့ ကာရာဘောင် ဖလား ကွာတားဖိုင်နယ် ပွဲစဉ်မှာ ပဲလေ့စ် အသင်းအတွက် အာဆင်နယ် အသင်းဘက်ကို ဂိုးတစ်ဂိုး သွင်းယူပေးခဲ့ပါသေးတယ်။ လက်ရှိမှာတော့ ဂွါဒီယိုလာ အနေနဲ့ ဒဏ်ရာ ပြဿနာတွေ ရင်ဆိုင်နေရတဲ့ သူ့ရဲ့ ခံစစ်ပိုင်းကို အားဖြည့်ဖို့အတွက် ဂူဟီ ကို အဓိက ကစားသမား အဖြစ် သတ်မှတ်ထားတာ တွေ့ရပါတယ်။

မန်စီးတီး အသင်းဟာ အဓိက နောက်ခံလူ ယော်စကို ဂါဗာဒီယော ကို ရေရှည် ဒဏ်ရာကြောင့် ဆုံးရှုံးထားရသလို ရူဘင် ဒီယက်စ် ကလည်း ပွဲစဉ် အများအပြား လွဲချော်နေခဲ့တာပါ။ ဒါကြောင့်လည်း ဂွါဒီယိုလာ အနေနဲ့ ကာရာဘောင် ဖလား ဗိုလ်လုပွဲမှာ ဂူဟီ ကို အသုံးပြုခွင့်ရဖို့ အခုလို တွန်းအားပေး တောင်းဆိုလာတာ ဖြစ်ပါတယ်။

နယူးကာဆယ် အသင်းကို အနိုင်ရခဲ့တဲ့ ဆီမီးဖိုင်နယ် ဒုတိယအကျော့ ပွဲစဉ်အပြီးမှာ ဂွါဒီယိုလာ က သက်ဆိုင်ရာ တာဝန်ရှိသူတွေနဲ့ စည်းမျဉ်း ပြောင်းလဲရေး ကိစ္စကို ဆွေးနွေးသွားမယ်လို့ အရိပ်အမြွက် ပြောကြားခဲ့ပါတယ်။

ဘီဘီစီ စပေါ့ဒ် ရဲ့ ဖော်ပြချက်အရ စပိန်လူမျိုး နည်းပြကြီးက “မာ့ခ် ဂူဟီ ဗိုလ်လုပွဲမှာ ကစားနိုင်ဖို့အတွက် ကာရာဘောင် ဖလား တာဝန်ရှိသူတွေကို ကျွန်တော်တို့ နားချနိုင်မယ်လို့ မျှော်လင့်ပါတယ်။ သူ ဘာကြောင့် ဗိုလ်လုပွဲမှာ ကစားခွင့် မရှိရတာလဲဆိုတာ ကျွန်တော် နားမလည်နိုင်ပါဘူး” လို့ ဆိုပါတယ်။

ဂွါဒီယိုလာ က ဆက်လက်ပြီး “ခင်ဗျားတို့က ကစားသမား တစ်ယောက်ကို ငွေအများကြီး ပေးပြီး ဝယ်ယူခဲ့ပေမယ့် ကျွန်တော် နားမလည်နိုင်တဲ့ စည်းမျဉ်း တစ်ခုကြောင့် သူက ကစားခွင့် မရဘူး ဖြစ်နေတယ်။ ဒါကို သူတို့ ပြောင်းလဲပေးလိမ့်မယ်လို့ မျှော်လင့်ပါတယ်။ ဒီကိစ္စကို ကလပ်အသင်း တာဝန်ရှိသူတွေ အနေနဲ့ သေချာပေါက် တောင်းဆိုရမယ်လို့ ကျွန်တော် ပြောထားပါတယ်” လို့ ဖွင့်ဟခဲ့ပါတယ်။

ဖီဖာ၊ ယူအီးအက်ဖ်အေ နဲ့ ပရီးမီးယားလိဂ် စည်းမျဉ်းတွေအရ အပြောင်းအရွှေ့ ဈေးကွက် ဖွင့်ချိန်မှာ ကစားသမားသစ် ဝယ်ယူရင် အဲ့ဒီ ကစားသမားက ပါဝင် ကစားခွင့် ရှိသင့်တာဟာ သဘာဝ ကျတဲ့ ကိစ္စ ဖြစ်တယ်လို့ ဂွါဒီယိုလာ က ထောက်ပြခဲ့ပါတယ်။

နောက်ဆုံးမှာတော့ သက်ဆိုင်ရာ တာဝန်ရှိသူတွေဆီက ဘယ်လို အဖြေမျိုး ရလာနိုင်မလဲလို့ မေးမြန်းရာမှာတော့ ဂွါဒီယိုလာ က “သူတို့ ငြင်းကောင်း ငြင်းပါလိမ့်မယ်။ ဒါပေမဲ့ ကျွန်တော်တို့ကတော့ အတတ်နိုင်ဆုံး ကြိုးစားသွားမှာပါ” လို့ ဖြေကြားခဲ့ပါတယ်။