ဂါလာတာစာရေးအသင်းရဲ့ ကြယ်ပွင့်ကစားသမား ဗစ်တာအိုစီမန်က သူ့ရဲ့ကလပ်ဟောင်း နာပိုလီအသင်းဟာ သူ့အပေါ် ခွေးတစ်ကောင်လို ဆက်ဆံခဲ့တယ် လို့ စွပ်စွဲပြောကြားလိုက်ပါတယ်။ ဒီညကစားမယ့် ချန်ပီယံလိဂ် ပလေးအော့ဖ် ပထမအကျော့ပွဲစဉ်မတိုင်ခင်မှာ အိုစီမန်ဟာ နာပိုလီမှာ ကုန်ဆုံးခဲ့တဲ့ သူ့ရဲ့အချိန်တွေအကြောင်းကို ပြောပြခဲ့တာပါ။

နာပိုလီမှာ စကူဒက်တိုဖလား အတူတူဆွတ်ခူးခဲ့ဖူးတဲ့ လက်ရှိ ဂျူဗင်တပ်စ်နည်းပြ စပယ်လက်တီနဲ့ ပတ်သက်ပြီး အိုစီမန်က "ကျွန်တော်တို့ အချင်းချင်း ရန်ဖြစ်ကြတယ်လို့ လူတွေက ပြောကြပေမဲ့ အဲဒါ မဟုတ်ပါဘူး။ ကျွန်တော် သူ့ကို အများကြီး လေးစားပါတယ်။ ကျွန်တော်တို့ဆီကနေ မျှော်လင့်ချက်တွေ အများကြီးရှိခဲ့သလို သူကလည်း အများကြီး ပေးဆပ်ခဲ့တာပါ။ တချို့နည်းပြတွေက သင့်ကို ဘောလုံးသမားတစ်ယောက် မဖြစ်လာခင် လူသားတစ်ယောက်အနေနဲ့ အရင်ဆုံး တိုးတက်အောင် ကူညီပေးကြတယ်" လို့ ဆိုပါတယ်။

"ဂါလာတာစာရေးနဲ့ အပြောင်းအရွှေ့ဆွေးနွေးမှုတွေ မစတင်ခင်မှာ ဂျူဗင်တပ်စ်အားကစားဒါရိုက်တာဟောင်း ဂျီယွန်တိုလီက ကျွန်တော့်ကို ဂျူဗင်တပ်စ်ဆီ ခေါ်ဖို့ ဖုန်းဆက်ခဲ့ပါတယ်။ ဒါပေမဲ့ သူ (နာပိုလီဥက္ကဋ္ဌ ဒီလော်ရန်တစ်) က ကျွန်တော့်ကို သွားခွင့်ပြုမှာမဟုတ်ဘူးဆိုတာ ကျွန်တော် သိနေခဲ့တယ်" လို့ ပြောပါတယ်။ "အထူးသဖြင့် ဘာတွေဖြစ်ပျက်ခဲ့လဲဆိုတာ ကျွန်တော် တစ်ခါမှ ထုတ်မပြောခဲ့တဲ့အတွက် ပရိသတ်တွေကို အားနာမိပါတယ်။ တချို့လူတွေဆို ကျွန်တော့်အိမ်ရှေ့အထိ လာပြီး ရှင်းပြဖို့ တောင်းဆိုကြတယ်။ ကျွန်တော် သူတို့နဲ့ စကားပြောခဲ့သလို ကျွန်တော့်နေရာမှာ ဝင်ခံစားကြည့်ဖို့လည်း တောင်းဆိုခဲ့ပါတယ်။ နာပိုလီက အဲဒီဗီဒီယိုကို တစ်တော့ခ်ပေါ် တင်လိုက်ပြီးတဲ့နောက်မှာတော့ တစ်ခုခုက အပြီးတိုင် ပျက်စီးသွားခဲ့ပါပြီ" လို့ ၎င်းက ဆိုပါတယ်။

၂၀၂၃ ခုနှစ် စက်တင်ဘာလတုန်းက ဘိုလော့ဂ်နာနဲ့ပွဲမှာ အိုစီမန် ပင်နယ်တီ လွဲချော်ခဲ့ပြီးနောက်မှာ ကလပ်အသင်းရဲ့ တစ်တော့ခ်ကနေ အဲဒီဗီဒီယိုကို တင်ခဲ့တာ ဖြစ်ပါတယ်။ သူက ဆက်ပြီး "ဘယ်သူမဆို ပင်နယ်တီ လွဲနိုင်တာပဲ၊ ဘယ်သူမဆို လှောင်ပြောင်ခံရနိုင်ပါတယ်။ ဒါပေမဲ့ နာပိုလီက ကျွန်တော့်ကိုမှ ရည်ရွယ်ပြီး သရော်ခဲ့တာပါ။ ကျွန်တော် လူမျိုးရေးခွဲခြား စော်ကားတာတွေကို ခံခဲ့ရလို့ ထွက်ခွာဖို့ ဆုံးဖြတ်ခဲ့တာပါ။ ကျွန်တော့်ရဲ့ အင်စတာဂရမ်ကနေ နာပိုလီအင်္ကျီနဲ့ ပုံတွေကို ဖျက်လိုက်တဲ့အခါမှာတော့ ပရိသတ်တွေ ကျွန်တော့်ကို အမြင်စောင်းလာအောင် သူတို့က လုပ်ခဲ့ကြတယ်။ တကယ်တော့ ကျွန်တော့်သမီးလေးဆိုရင် နိုင်ဂျီးရီးယားထက် နာပိုလီက လူတစ်ယောက်နဲ့ ပိုတောင် တူနေပါသေးတယ်" လို့ ပြောပါတယ်။

အဲဒီနောက်ပိုင်းလတွေနဲ့ ပတ်သက်ပြီး တိုက်စစ်မှူး အိုစီမန်က "ကျွန်တော်တို့ကြားမှာ လူကြီးလူကောင်းဆန်ဆန် သဘောတူညီမှု တစ်ခုရှိခဲ့ပါတယ်။ နောက်လာမယ့် နွေရာသီမှာ ကျွန်တော် ထွက်ခွာခွင့်ရမယ်ဆိုတာပါပဲ။ ဒါပေမဲ့ တစ်ဖက်မှာတော့ အဲဒီကတိက တည်မနေခဲ့ပါဘူး။ သူတို့က ကျွန်တော့်ကို ဟိုတစ်နေရာ၊ ဒီတစ်နေရာ ပို့ဖို့ ကြိုးစားခဲ့ကြပြီး ကျွန်တော့်ကို ခွေးတစ်ကောင်လို ဆက်ဆံခဲ့ကြတာပါ။ ဒီကိုသွား၊ ဟိုကိုသွား၊ ဒါလုပ်၊ ဟိုဟာလုပ်နဲ့... ကျွန်တော့်ရဲ့ ကစားသမားဘဝ တိုးတက်ဖို့အတွက် အပင်ပန်းခံ ကြိုးစားခဲ့ရတာမို့ အဲဒီလို ဆက်ဆံခံရတာကို ကျွန်တော် လက်မခံနိုင်ပါဘူး။ ကျွန်တော် ပြန်ရောက်လာတာနဲ့ နည်းပြ ကွန်တီက သူ့ရုံးခန်းကို ခေါ်ပြီး အခြေအနေအားလုံးကို သိထားတယ်၊ ဒါပေမဲ့ ကျွန်တော့်ကို အသင်းမှာ ဆက်ရှိစေချင်တယ်လို့ ပြောခဲ့ပါတယ်။ ကျွန်တော်လည်း သူနဲ့ အတူတူ အလုပ်လုပ်ချင်တယ်ဆိုတာကို ရှင်းပြခဲ့ပါတယ်။ ဒါပေမဲ့ အဲဒီအချိန်မှာ ကျွန်တော် ဆုံးဖြတ်ချက် ချပြီးသားပါ။ ကိုယ်မပျော်တဲ့ နေရာမှာ ဆက်ပြီး အလုပ်မလုပ်ချင်တော့ပါဘူး" လို့ ပြောကြားခဲ့ပါတယ်။