အင်တာမီလန်အသင်းဟာ သူတို့ရဲ့ ကစားသမား ဖရန်ချက်စကို ပီယို အက်စပိုစီတိုအပေါ် အာဆင်နယ်အသင်းက စိတ်ဝင်စားနေတာကို စိုးရိမ်ပူပန်နေပါတယ်။Tuttosport သတင်းဌာနရဲ့ ဖော်ပြချက်အရ အာဆင်နယ်အသင်းရဲ့ အီတလီလူမျိုး ဘောလုံးစီမံခန့်ခွဲမှုတာဝန်ခံ အန်ဒရီယာ ဘာတာဟာ အက်စပိုစီတိုကို သဘောကျနှစ်သက်နေသူဖြစ်ပြီး လာမယ့် နွေရာသီအပြောင်းအရွှေ့ဈေးကွက်အတွက် အက်စပိုစီတိုကို အကဲခတ် စောင့်ကြည့်ခိုင်းနေတယ်လို့ သိရပါတယ်။

ဘာတာဟာ အီတလီလက်ရွေးစင် အက်စပိုစီတိုကို စပီဇီယာအသင်းမှာ လူငယ်ကစားသမားဘဝ မစတင်ခင်ကတည်းက စောင့်ကြည့်နေခဲ့တာ ဖြစ်ပါတယ်။ ဒါပေမဲ့ အင်တာမီလန်အသင်းကတော့ အဆိုပါ လူငယ်ဗဟိုတိုက်စစ်မှူးကို စာချုပ်သစ် ကမ်းလှမ်းခြင်းအားဖြင့် ပရီးမီးယားလိဂ် ထိပ်သီးအသင်းရဲ့ စိတ်ဝင်စားမှုကို ဖြတ်တောက်ဖို့ ရည်ရွယ်ထားပါတယ်။ အင်တာမီလန်ဟာ အက်စပိုစီတိုကို ၂၀၃၁ ခုနှစ်အထိ သက်တမ်းရှိမယ့် ငါးနှစ်စာချုပ်အသစ် ကမ်းလှမ်းသွားမှာဖြစ်ပြီး လက်ရှိရရှိနေတဲ့ လစာ ယူရို ၁.၁ သန်းကနေ အပိုဆုကြေးတွေအပြင် ယူရို ၃ သန်းအထိ တိုးမြှင့်ပေးသွားဖို့ စီစဉ်နေတာ ဖြစ်ပါတယ်။