အသင်းခေါင်းဆောင်ဟောင်း ဟာဘစ်ဘီယေးကို အသင်းရဲ့ နည်းပြသစ်အဖြစ် ခန့်အပ်လိုက်ပြီဖြစ်ကြောင်း မာဆေးလ်အသင်းက ဗုဒ္ဓဟူးနေ့မှာ အတည်ပြုထုတ်ပြန်ခဲ့ပါတယ်။ ဒါဟာ သူဟာ ပြိုင်ဘက် လီဂူးဝမ်းကလပ် ရန်းနက်စ်အသင်းကနေ ထုတ်ပယ်ခံရပြီး တစ်ပတ်အကြာမှာပဲ အခုလို ခန့်အပ်ခံရတာ ဖြစ်ပါတယ်။အသက် ၄၈ နှစ်အရွယ် ဘီယေးဟာ ပြီးခဲ့တဲ့အပတ်က ပြိုင်ဘက် ပီအက်စ်ဂျီအသင်းကို ၅ ဂိုးပြတ်နဲ့ အရှက်တကွဲ ရှုံးနိမ့်ခဲ့ပြီးနောက် ရာထူးကနေ ထွက်ခွာသွားခဲ့တဲ့ အီတလီလူမျိုးနည်းပြ ရော်ဘတ်တို ဒီဇာဘီရဲ့ နေရာကို အစားဝင်မှာ ဖြစ်ပါတယ်။

လက်ရှိမှာ မာဆေးလ်အသင်းဟာ ရာသီကုန်ဖို့ ၁၂ ပွဲအလိုမှာ ပြင်သစ်လီဂူးဝမ်း အဆင့် ၄ နေရာမှာ ရပ်တည်နေပြီး အဆင့် ၃ က လိုင်ယွန်နဲ့ ၅ မှတ်၊ ဇယားထိပ်က လန်းစ်အသင်းနဲ့ ၁၂ မှတ် ကွာဟနေပါတယ်။

ပြင်သစ်လိဂ်ရဲ့ ထိပ်ဆုံး ၃ သင်းက လာမယ့်ရာသီ ချန်ပီယံလိဂ်ပြိုင်ပွဲကို တိုက်ရိုက်ဝင်ခွင့်ရမှာဖြစ်ပြီး အဆင့် ၄ ရတဲ့အသင်းကတော့ ခြေစစ်ပွဲ တတိယအဆင့်ကနေ ယှဉ်ပြိုင်ရမှာပါ။

ဘီယေးကို ကြာသပတေးနေ့မှာ တရားဝင် မိတ်ဆက်သွားမှာဖြစ်ပြီး သောကြာနေ့မှာ ကစားမယ့် ဘရက်စ်အသင်းနဲ့ အဝေးကွင်းပွဲစဉ်ဟာ သူ့အတွက် ပထမဆုံး ကိုင်တွယ်ရမယ့် ပွဲစဉ် ဖြစ်လာပါလိမ့်မယ်။

ဆီနီဂေါလက်ရွေးစင် နောက်ခံလူဟောင်း ဘီယေးဟာ ရန်းနက်စ်အသင်းကို တစ်နှစ်ကျော်ကြာ ကိုင်တွယ်ခဲ့ဖူးသလို အောက်တန်းကလပ် Red Star အသင်းမှာလည်း နည်းပြလုပ်ခဲ့ဖူးပါတယ်။ ဒါ့အပြင် ပြင်သစ်ရုပ်သံလိုင်းတွေမှာလည်း ထင်ရှားတဲ့ ဘောလုံးသုံးသပ်သူတစ်ဦးအဖြစ် ဆောင်ရွက်ခဲ့သူပါ။

သူဟာ ၂၀၀၃ ခုနှစ်ကနေ ၂၀၀၇ ခုနှစ်အထိ မာဆေးလ်အသင်းမှာ ကစားခဲ့ပြီး ၂၀၀၄ ယူအီးအက်ဖ်အေဖလား ဗိုလ်လုပွဲမှာ ဗလင်စီယာကို ရှုံးနိမ့်ခဲ့စဉ်က ဒရော့ဘာနဲ့အတူ တွဲဖက်ကစားခဲ့သူလည်း ဖြစ်ပါတယ်။

ဒါ့အပြင် စထရာဘာ့အသင်းမှာလည်း ကစားခဲ့သလို အင်္ဂလန်ကလပ်တွေဖြစ်တဲ့ နယူးကာဆယ်၊ အက်စတွန်ဗီလာနဲ့ ဒုတိယတန်းက ဒွန်ကက်စတာအသင်းတို့မှာလည်း ကစားသမားဘဝကို ဖြတ်သန်းခဲ့ပါတယ်။

"သူ့ရဲ့ မာဆေးလ်အသင်းအပေါ် ထားရှိတဲ့ သံယောဇဉ်နဲ့ အသင်းရဲ့ ပတ်ဝန်းကျင်အကြောင်း ကောင်းကောင်းသိရှိမှုတွေဟာ ကလပ်အသင်းကို နောက်တစ်ဆင့် တက်လှမ်းနိုင်ဖို့အတွက် အားသာချက်တွေ ဖြစ်လာပါလိမ့်မယ်" လို့ မာဆေးလ်အသင်းက ထုတ်ပြန်ခဲ့ပေမဲ့ စာချုပ်သက်တမ်းကိုတော့ ထုတ်ဖော်ပြောကြားခြင်း မရှိပါဘူး။

ဘီယေး မာဆေးလ်ကို ရောက်လာတဲ့ သတင်းဟာ သူနဲ့ ရန်းနက်စ်အသင်းတို့ စာချုပ်ဖျက်သိမ်းမှု အပြီးသတ်ပြီး နာရီပိုင်းအကြာမှာပဲ ထွက်ပေါ်လာတာဖြစ်သလို ရန်းနက်စ်အသင်းကလည်း သူ့နေရာမှာ ဖရန့်ခ် ဟေ့စ် ကို အစားထိုး ခန့်အပ်လိုက်ပြီဖြစ်ကြောင်း ကြေညာခဲ့ပါတယ်။

ပြင်သစ်လူမျိုး နည်းပြ ဟေ့စ်ဟာ ၂၀၂၇ အထိ စာချုပ်ချုပ်ဆိုခဲ့တာဖြစ်ပြီး သူ တာဝန်မယူခင်မှာ ဘီယေးရဲ့ ရန်းနက်စ်အသင်းဟာ လီဂူးဝမ်း အဆင့် ၆ နေရာမှာ ရှိနေခဲ့တာပါ။

အသက် ၅၄ နှစ်အရွယ် ဟေ့စ်ဟာ ၂၀၂၃-၂၄ ရာသီတုန်းက လန်းစ်အသင်းကို လီဂူးဝမ်း ဒုတိယဆု ရရှိအောင် စွမ်းဆောင်ပေးနိုင်ခဲ့ပြီး ချန်ပီယံလိဂ် အုပ်စုအဆင့်အထိ ပို့ဆောင်ပေးနိုင်ခဲ့သူ ဖြစ်ပါတယ်။

သူဟာ ၂၀၂၄ ဇွန်လမှာ နိုက်စ်အသင်းကို ပြောင်းရွှေ့ခဲ့ပေမဲ့ လိဂ် ၁၆ ပွဲမှာ ၅ ပွဲသာ အနိုင်ရခဲ့တာကြောင့် ဒီဇင်ဘာမှာ လမ်းခွဲခဲ့ရပါတယ်။ အခုတော့ သူဟာ ၂၀၀၆ ကနေ ၂၀၁၂ အထိ နည်းပြအဖြစ် ခြောက်နှစ်ကြာ တာဝန်ယူခဲ့ဖူးတဲ့ ရန်းနက်စ်အသင်းရဲ့ အကယ်ဒမီကို ပြန်လည်ရောက်ရှိလာတာပါ။

"ရန်းနက်စ်အသင်းကို ပြန်လာရတာ တကယ်ကို ဝမ်းသာဂုဏ်ယူမိပါတယ်။ အသင်းသားတွေနဲ့အတူ အခုလို အသင်းကြီးတစ်သင်းဆီ ပြန်လာခွင့်ရတာ တကယ့်ကို ပျော်စရာပါပဲ" လို့ ဟေ့စ်က ပြောကြားခဲ့ပါတယ်။