ဗာစကိုဒဂါးမားအသင်းက ယူနိုက်တက်နည်းပြဟောင်း အာမိုရင်ကို ခေါ်ယူဖို့ စိတ်ဝင်စားနေ
မန်ချက်စတာယူနိုက်တက် နည်းပြဟောင်း ရူဘင်အာမိုရင်ကို ဘရာဇီးလ်ကလပ်အသင်းတွေက ခေါ်ယူချင်နေကြပါတယ်။ ပေါ်တူဂီလူမျိုးနည်းပြ အာမိုရင်ဟာ ပြီးခဲ့တဲ့လက ယူနိုက်တက်ကနေ ထုတ်ပယ်ခံရပြီးနောက် သူ့ရဲ့ရှေ့ဆက်မယ့် လမ်းကြောင်းတွေအတွက် စဉ်းစားဆုံးဖြတ်နေတာ ဖြစ်ပါတယ်။
စပို့တင်းနည်းပြဟောင်း အာမိုရင်ဟာ ဘင်ဖီကာအသင်းမှာ ဂျိုဆေးမော်ရင်ဟိုရဲ့ ရာထူးနေရာကို အစားထိုးဖို့ သတင်းတွေ ထွက်ပေါ်နေသလို၊ ဘရာဇီးလ်နိုင်ငံကလည်း သူ့ကို ခေါ်ယူဖို့ စိတ်ဝင်စားနေတာပါ။ VDG-Cast ရဲ့ ဖော်ပြချက်အရ အာမိုရင်ဟာ ဗာစကိုဒဂါးမားအသင်းရဲ့ ပစ်မှတ်တစ်ခု ဖြစ်နေတယ်လို့ သိရပါတယ်။
ဗာစကိုဒဂါးမားအသင်းဟာ ပြီးခဲ့တဲ့အပတ်က နည်းပြ ဖာနန်ဒိုဒီးနစ်နဲ့ လမ်းခွဲခဲ့ပြီးနောက် နည်းပြသစ်တစ်ဦးကို ရှာဖွေနေတာပါ။ ဖာနန်ဒိုဒီးနစ်ဟာ တနင်္ဂနွေနေ့က ဖလူမီနန်ဆီအသင်းကို ၁-၀ နဲ့ ရှုံးနိမ့်ခဲ့တဲ့ပွဲအပြီးမှာ ရာထူးကနေ အထုတ်ခံခဲ့ရတာ ဖြစ်ပါတယ်။
လက်ရှိလိဂ်ပွဲစဉ်တွေမှာတော့ အသင်းဟာ ရာသီသစ်ရဲ့ အဖွင့် ၃ ပွဲမှာ ရမှတ် ၁ မှတ်သာ ရရှိထားပြီး အမှတ်ပေးဇယား အဆင့် ၁၇ နေရာမှာ ရောက်ရှိနေပါတယ်။
