မန်ချက်စတာယူနိုက်တက် တိုက်စစ်မှူးဟောင်း မိုက်ကယ်အိုဝင်က ယာယီနည်းပြ မိုက်ကယ်ကာရစ်ကို အမြဲတမ်းနည်းပြအဖြစ် ခန့်အပ်ဖို့ မသင့်တော်ဘူးဆိုတဲ့ ပြောဆိုချက်တွေအပေါ် ပြင်းပြင်းထန်ထန် ဝေဖန်တုံ့ပြန်လိုက်ပါတယ်။

မိုက်ကယ်ကာရစ်ဟာ ယူနိုက်တက်ရဲ့ ယာယီနည်းပြအဖြစ် စတင်တာဝန်ယူချိန်ကစပြီး အိမ်မက်ဆန်တဲ့ အစပြုမှုကို ပိုင်ဆိုင်ထားတာပါ။ သူဟာ တာဝန်ယူခဲ့တဲ့ ပထမဆုံး ၃ ပွဲဆက်တိုက်မှာ နိုင်ပွဲတွေ ရယူပေးနိုင်ခဲ့ပါတယ်။

ယူနိုက်တက်ဂန္ထဝင် ကာရစ်ဟာ မန်ချက်စတာစီးတီး၊ အာဆင်နယ်နဲ့ ဖူဟမ်တို့လို အသင်းကြီးတွေကို အနိုင်ယူခဲ့တာ ဖြစ်ပါတယ်။ လက်ရှိမှာ ယူနိုက်တက်ဟာ ပရီးမီးယားလိဂ် အမှတ်ပေးဇယားရဲ့ အဆင့် ၄ နေရာမှာ ရပ်တည်နေပြီး ချန်ပီယံလိဂ်ဝင်ခွင့်အတွက် အခြေအနေကောင်းတွေကို ပိုင်ဆိုင်ထားပါတယ်။

ရလဒ်တွေတင်မကဘဲ အသင်းရဲ့ ကစားပုံကလည်း သိသိသာသာ တိုးတက်လာခဲ့တာပါ။ ဝိန်းရူနီကတောင် ကာရစ်ဟာ ယူနိုက်တက်ရဲ့ DNA ကို ပြန်လည်ဖော်ဆောင်နိုင်ခဲ့တယ်လို့ ချီးကျူးခဲ့ပါတယ်။ ကာရစ်ဟာ အချိန်တိုအတွင်းမှာပဲ တိုက်စစ်ဆင်ကစားတဲ့ ပုံစံကို အစားထိုးနိုင်ခဲ့ပြီး ပရိသတ်တွေရဲ့ မျှော်လင့်ချက်ကို ပြန်လည်ရှင်သန်စေခဲ့ပါတယ်။

ဒါပေမဲ့ ဒီလိုကောင်းမွန်တဲ့ အချက်တွေ ရှိနေပေမဲ့လည်း တချို့ကတော့ ကာရစ်ကို ဘယ်လိုအခြေအနေမျိုးမှာမဆို အမြဲတမ်းနည်းပြအဖြစ် မခန့်အပ်သင့်ဘူးလို့ ယူဆနေကြပါတယ်။

ရွိုင်ကိန်းကတော့ ဒီအချက်ကို လူသိရှင်ကြား ထုတ်ဖော်ပြောဆိုထားသလို ဂယ်ရီနဗီးလ်ကလည်း လွန်ခဲ့တဲ့ နှစ်အနည်းငယ်က အိုလီဂန်နာဆိုးရှားနဲ့ ကြုံတွေ့ခဲ့ရတဲ့ မှားယွင်းမှုကို ထပ်မံမကျူးလွန်မိဖို့ သတိပေးထားပါတယ်။

ဒါပေမဲ့ မိုက်ကယ်အိုဝင်ကတော့ ဒီလိုပြောဆိုချက်တွေကို ပယ်ချလိုက်ပြီး ကာရစ်သာ ရလဒ်ကောင်းတွေ ဆက်တိုက်ဖော်ဆောင်နိုင်ရင် သူ့ကို အမြဲတမ်းနည်းပြအဖြစ် ထည့်သွင်းစဉ်းစားရမယ်လို့ အခိုင်အမာ ဆိုခဲ့ပါတယ်။

"ကျွန်တော် တကယ်ပြောတာပါ။ တချို့လူတွေက ရာသီကုန်အထိ ပွဲတိုင်းနိုင်ရင်တောင် သူ့ကို အမြဲတမ်းနည်းပြ မခန့်သင့်ဘူးလို့ ပြောနေကြတယ်။ ဘာဖြစ်လို့လဲ၊ ဘာကို ဆိုလိုတာလဲ" လို့ အိုဝင်က မေးခွန်းထုတ်ခဲ့ပါတယ်။

"ပြီးခဲ့တဲ့ ၁၀ နှစ်၊ ၁၂ နှစ်လောက်က ဘာတွေဖြစ်ခဲ့လဲဆိုတာ သူတို့ မမြင်ကြဘူးလား။ သူတို့က ကာရစ်ကို အစပိုင်းမှာ ကောင်းပြီး နောက်ပိုင်းမှာ လက်စပျောက်သွားတဲ့ အိုလီဂန်နာဆိုးရှားနဲ့ သွားနှိုင်းယှဉ်နေကြတယ်" လို့ အိုဝင်က ဆိုပါတယ်။

"ဒါပေမဲ့ ကာရစ်ကတော့ လုံးဝကို ကွဲပြားတဲ့ လူတစ်ယောက်ပါ။ မန်ချက်စတာယူနိုက်တက်က အကောင်းဆုံး ပုံစံနဲ့ ပွဲတိုင်းကို နိုင်နေမယ်ဆိုရင် ဘာဖြစ်လို့ သူ့ကို မခန့်ရမှာလဲ။ အသင်းကလည်း တိုးတက်နေတယ်၊ ကစားသမားတွေကလည်း ပျော်ပျော်ရွှင်ရွှင်နဲ့ ကစားနေကြတယ်၊ သူကိုယ်တိုင်ကလည်း အရည်အချင်းရှိတဲ့ လူကြီးလူကောင်းတစ်ယောက်ပါ" လို့ အိုဝင်က ဖွင့်ဟခဲ့ပါတယ်။

အိုဝင်က ဆက်လက်ပြီး "အခုချက်ချင်းကြီး အမြဲတမ်းနည်းပြ ခန့်လိုက်ပါလို့ ကျွန်တော် မပြောပါဘူး။ ဒါပေမဲ့ ယူနိုက်တက်သာ ချန်ပီယံလိဂ်ဝင်ခွင့် ရခဲ့မယ်ဆိုရင်တော့ ဒါဟာ သူ တကယ်တော်လို့ပဲ ဖြစ်မှာပါ။ အသင်းက တိုးတက်နေတာကို ဘာလို့ ဖယ်ထုတ်ချင်နေကြတာလဲ" လို့ ပြောကြားခဲ့ပါတယ်။

"ပေါ်တူဂီက နည်းပြသစ်တွေကို လိုက်ရှာနေမယ့်အစား လက်ရှိမှာ အဆင်ပြေနေတာကိုပဲ ဆက်သွားသင့်ပါတယ်။ ကာရစ်သာ ရလဒ်ကောင်းတွေ ဆက်ယူနိုင်မယ်ဆိုရင် သူ့ကိုပဲ ရာသီကုန်မှာ အမြဲတမ်းနည်းပြ ခန့်သင့်တယ်လို့ ကျွန်တော် အပြည့်အဝ ယုံကြည်ပါတယ်" လို့ အိုဝင်က နိဂုံးချုပ်ခဲ့ပါတယ်။

မိုက်ကယ်ကာရစ်နဲ့ ယူနိုက်တက်အသင်းသားတွေဟာ လာမယ့် စနေနေ့မှာတော့ တော့တင်ဟမ်စပါးအသင်းကို အိမ်ကွင်းမှာ လက်ခံကစားရမှာ ဖြစ်ပါတယ်။