မန်ချက်စတာယူနိုက်တက်အသင်းက ဒီနွေရာသီမှာ အန်ဒရေအိုနာနာကို ရောင်းထုတ်ဖို့ စီစဉ်နေပေမဲ့ ဂိုးသမားဖြစ်သူကတော့ အသင်းမှာ သူ့နေရာအတွက် ဆက်ပြီးတိုက်ပွဲဝင်သွားချင်နေပါတယ်။

ဒီကင်မရွန်းလက်ရွေးစင်ဂိုးသမားဟာ ဂရင်စဘီတောင်းနဲ့ကစားခဲ့တဲ့ ကာရာဘောင်းဖလားပွဲစဉ်မှာ စိတ်ပျက်စရာကောင်းလောက်အောင် ခြေစွမ်းပြနိုင်ခြင်းမရှိခဲ့ဘဲ အဲ့ဒီပွဲဟာ သူ့အတွက် နောက်ဆုံးအခွင့်အရေးကို ဆုံးရှုံးစေခဲ့ပြီးနောက် ထရတ်ဇွန်စပေါ်အသင်းဆီ အငှားချခံခဲ့ရတာ ဖြစ်ပါတယ်။

အငှားသက်တမ်းကုန်ဆုံးပြီးနောက် သူဟာ ယူနိုက်တက်ရဲ့ ရာသီကြိုလေ့ကျင့်ခန်းတွေကို ပြန်လည်ပူးပေါင်းရမှာ ဖြစ်ပါတယ်။ သူပြန်လည်ပူးပေါင်းမယ့် ယာယီနည်းပြ မိုက်ကယ်ကာရစ်ရဲ့အသင်းမှာတော့ ဂိုးသမား ဆန်းနီလန်းမန့်စ်က လက်စွမ်းပြနေပါတယ်။

အသက် ၂၃ နှစ်အရွယ် ဘယ်လ်ဂျီယံဂိုးသမားရဲ့ စွမ်းဆောင်ရည်ဟာ တူရကီကို ပြောင်းရွှေ့ပြီးကတည်းက ရုန်းကန်နေရတဲ့ အိုနာနာထက် အများကြီး ပိုမိုကောင်းမွန်တယ်ဆိုတာကို သက်သေပြနေပါတယ်။

နည်းပြကာရစ်ကတော့ ပရိသတ်တွေရဲ့ အချစ်တော် မြန်မြန်ဆန်ဆန်ဖြစ်လာခဲ့တဲ့ ဒီလူငယ်ဂိုးသမားလေးကို အခုရာသီအစောပိုင်းမှာ ချီးကျူးစကား ပြောကြားခဲ့ဖူးပါတယ်။

"ဂိုးသမားတစ်ယောက်ဆိုတာ ယုံကြည်အားကိုးလို့ရရမယ်၊ စိတ်ချရရမယ်။ အမှားအယွင်းတွေလုပ်ပြီး ရှုပ်ထွေးအောင်လုပ်မယ့်အစား အခြေအနေတွေကို တည်ငြိမ်သွားအောင် လုပ်ပေးနိုင်ရမယ်။ ဆန်းနီက အဲဒီလိုလူမျိုးပါပဲ။ သူက တစ်ခါတလေ တိတ်တိတ်ဆိတ်ဆိတ်နဲ့ အေးအေးဆေးဆေး နေတတ်ပေမဲ့ တကယ်တမ်းကျရင်တော့ အရမ်းကို စိတ်ဓာတ်ကြံ့ခိုင်ပါတယ်။ ဒီလိုနေရာမှာ အစားထိုးဝင်ကစားဖို့ဆိုတာ တချို့လူတွေအတွက်တော့ တကယ့်တာဝန်ကြီးတစ်ခုပါ" လို့ ယာယီနည်းပြက ဆိုပါတယ်။

ဒါပေမဲ့ အခက်အခဲတွေရှိနေပေမဲ့လည်း အိုနာနာက ယူနိုက်တက်အသင်းမှာ သူ့နေရာကို ပြန်ရဖို့ ကြိုးစားချင်နေပြီး အခွင့်အရေးကောင်းတွေ ရှိနေသေးတယ်လို့ ယုံကြည်နေကြောင်း The Guardian က ဖော်ပြထားပါတယ်။

ရူဘင်အမော်ရင်နဲ့ အဲရစ်တန်ဟက်တို့ လက်ထက်မှာ ယူနိုက်တက်ဟာ အယ်တေးဘိုင်ယင်ဒါနဲ့ အန်ဒရေအိုနာနာတို့ကို အသုံးပြုခဲ့ပေမဲ့ နှစ်ယောက်စလုံးကတော့ နည်းပြနှစ်ဦးစလုံးရဲ့ လက်ထက်မှာ စိတ်မချရတဲ့ အခြေအနေမှာပဲ ရှိခဲ့ကြပါတယ်။

အိုနာနာရဲ့ အငှားသက်တမ်းက မေလမှာ ကုန်ဆုံးမှာဖြစ်ပြီး ကာရစ်က သူ့ကို လန်းမန့်စ်နဲ့အတူ အခွင့်အရေးပေးမလားဆိုတာ စောင့်ကြည့်ရမှာပါ။ ဒါကတော့ ယူနိုက်တက်ပရိသတ်တော်တော်များများအတွက် စိုးရိမ်စရာ ဖြစ်နေနိုင်ပါတယ်။