ဘာစီလိုနာအသင်းရဲ့ ဥက္ကဋ္ဌဖြစ်သူ ဂျိုအန်လာပေါ်တာက သူတို့နဲ့ ပြိုင်ဘက် ရီးရဲလ်မက်ဒရစ်အသင်းကြားက ဆက်ဆံရေးဟာ တစ်နေ့ထက်တစ်နေ့ ပိုမိုတင်းမာလာနေတယ်လို့ ပွင့်ပွင့်လင်းလင်း ဝန်ခံပြောကြားလိုက်ပါတယ်။

ဘာစီလိုနာအသင်းအနေနဲ့ ဥရောပစူပါလိဂ်စီမံကိန်းကနေ တရားဝင်နှုတ်ထွက်ကြောင်း ကြေညာခဲ့ပြီးနောက်မှာ ဥက္ကဋ္ဌ လာပေါ်တာက အသင်းရဲ့ လက်ရှိအခြေအနေတွေနဲ့ ပတ်သက်ပြီး အခုလို ရှင်းလင်းခဲ့တာပါ။

လာပေါ်တာက သူတို့အနေနဲ့ အခြားသော ဘောလုံးအဖွဲ့အစည်းတွေနဲ့ ဆက်ဆံရေးကို ပြန်လည်တည်ဆောက်နိုင်ခဲ့ပြီဖြစ်ပြီး အဖွဲ့အစည်းအချင်းချင်းကြားမှာ သဟဇာတဖြစ်မှုရှိဖို့ လိုအပ်တယ်လို့ ဆိုပါတယ်။

ဘဏ္ဍာရေးဆိုင်ရာ ထိန်းချုပ်မှု စည်းမျဉ်းတွေနဲ့ အဲဒီစည်းမျဉ်းတွေကို ကျင့်သုံးပုံတွေအပေါ် သဘောထားကွဲလွဲမှုတွေ ရှိနိုင်ပေမဲ့ လက်ရှိမှာတော့ ပုံမှန်အတိုင်း ပြေပြေလည်လည် ရှိနေပြီဖြစ်ကြောင်း သိရပါတယ်။

အထူးသဖြင့် စပိန်ဘောလုံးအဖွဲ့ချုပ်နဲ့ အမြဲမပြတ် ဆက်သွယ်မှုတွေရှိနေသလို ယူအီးအက်ဖ်အေနဲ့လည်း ဘောလုံးမိသားစုဝင်အဖြစ် ပြန်လည်ပူးပေါင်းကာ စူပါလိဂ်ကနေ အပြီးတိုင် ထွက်ခွာခဲ့ပြီလို့ လာပေါ်တာက အတည်ပြုပါတယ်။

ဒါ့အပြင် ဖီဖာအဖွဲ့ချုပ် အပါအဝင် ဥက္ကဋ္ဌဖြစ်သူနဲ့လည်း ကောင်းမွန်တဲ့ ဆက်ဆံရေး ရှိနေပြီဖြစ်ကြောင်း ၎င်းက ဖြည့်စွက်ပြောကြားခဲ့ပါတယ်။

စူပါလိဂ်ကနေ နှုတ်ထွက်ခဲ့ရတဲ့ အကြောင်းရင်းနဲ့ ပတ်သက်လို့တော့ "အကောင်အထည်ဖော်ဖို့ မဖြစ်နိုင်တဲ့ စီမံကိန်းတစ်ခုဖြစ်သလို တဖြည်းဖြည်းနဲ့လည်း ပြိုကွဲလာတာကြောင့် နှုတ်ထွက်ခဲ့တာပါ" လို့ လာပေါ်တာက ရှင်းပြပါတယ်။

ဒါပေမဲ့ အဲဒီစီမံကိန်းဟာ ယူအီးအက်ဖ်အေအနေနဲ့ ပြိုင်ပွဲပုံစံတွေကို ပြောင်းလဲဖို့အတွက် တွန်းအားတစ်ရပ်တော့ ဖြစ်ခဲ့တယ်လို့ သူက ရှုမြင်နေပါတယ်။

ရီးရဲလ်မက်ဒရစ်အသင်းနဲ့ ဆက်ဆံရေးအပေါ်မှာတော့ "ရီးရဲလ်နဲ့ ဆက်ဆံရေးကတော့ မကောင်းပါဘူး။ ဒါဟာ စိတ်အနှောင့်အယှက်ဖြစ်စရာ အမြဲတမ်း ဖန်တီးနေပါတယ်။ ဘာစီလိုနာကတော့ မှန်ကန်စွာနဲ့ ပွင့်လင်းမြင်သာမှုရှိရှိ လုပ်ဆောင်ခဲ့တာပါ" လို့ လာပေါ်တာက ဖွင့်ဟခဲ့ပါတယ်။

မိမိတို့အနေနဲ့ ဥရောပဘောလုံးလောက ရေရှည်တည်တံ့ဖို့နဲ့ အားကစားလောကအတွင်း ငြိမ်းချမ်းမှုရှိစေဖို့အတွက် အကောင်းဆုံး ပါဝင်ကူညီသွားမယ်လို့လည်း ဆိုပါတယ်။

"ကျွန်တော်ဟာ ဘာစီလိုနာကို ချစ်တဲ့စိတ်နဲ့ ဝါသနာပါပါ ဦးဆောင်နေတာပါ။ ချမှတ်သမျှ ဆုံးဖြတ်ချက်တွေအတွက်လည်း ကျွန်တော် တာဝန်ယူပါတယ်။ ဘယ်အရာကိုမှ ဖုံးကွယ်ထားမှာမဟုတ်ဘဲ အခြေအနေတွေကို ရဲရဲဝံ့ဝံ့ ရင်ဆိုင်သွားမှာပါ" လို့ လာပေါ်တာက ပြောကြားခဲ့ပါတယ်။

လက်ရှိ ဘာစီလိုနာအသင်းရဲ့ ဆုံးဖြတ်ချက်အားလုံးဟာ ဒါရိုက်တာဘုတ်အဖွဲ့ရဲ့ သဘောတူညီချက်နဲ့သာ ဆောင်ရွက်တာဖြစ်ကြောင်းလည်း ၎င်းက အခိုင်အမာ ပြောကြားသွားခဲ့ပါတယ်။