တနင်္လာနေ့ညကလာလီဂါပွဲမှာ ဂျီရိုနာအသင်း သွင်းယူသွားတဲ့ အနိုင်ဂိုးဟာ ဂိုးအဖြစ် မသတ်မှတ်သင့်တဲ့ အနေအထားမျိုးဖြစ်ပေမယ့် ရှုံးပွဲအတွက် ကွင်းလယ်ဒိုင်ကို အပြစ်တင်နေလို့မရဘူးလို့ ဘာစီလိုနာနောက်ခံလူ ပေါ်ကူဘာဆီက အခိုင်အမာ ပြောကြားလိုက်ပါတယ်။

ဘာစီလိုနာဟာ အဆိုပါပွဲစဉ်မှာ ၂-၁ ဂိုးနဲ့ ရှုံးနိမ့်ခဲ့တာဖြစ်ပြီး ဖရန်ဘီလ်ထရန် သွင်းယူခဲ့တဲ့ ဂျီရိုနာရဲ့ နောက်ကျအနိုင်ဂိုးဟာ အငြင်းပွားစရာ ဖြစ်ခဲ့ပါတယ်။ အဲ့ဒီဂိုးမသွင်းခင် အခြေအနေမှာ ကလော်ဒီယို အီချီဗာရီက ဂျူးလက်စ်ကွန်ဒီကို ပြစ်ဒဏ်ဘောကျူးလွန်ခဲ့တယ်လို့ ဘာစီလိုနာအသင်းဘက်က ယူဆနေကြတာပါ။

ပွဲအပြီးမှာတော့ ကူဘာဆီက "ဒါကို အားလုံးလည်း မြင်ကြမှာပါ။ ဘာဖြစ်ခဲ့သလဲဆိုတာ လူတိုင်း သိပါတယ်။ ဒါပေမဲ့ ကျွန်တော်တို့ ဒိုင်လူကြီးကိုပဲ အပြစ်တင်နေလို့ မရပါဘူး၊ ကိုယ့်ကိုယ်ကိုယ်ပဲ ပြန်ပြီး ပြင်ဆင်ရပါမယ်" လို့ ပြောကြားခဲ့ပါတယ်။

"အဲ့ဒီလိုမျိုး ဂိုးနှစ်ဂိုး အပေးမခံသင့်ပါဘူး။ ကျွန်တော်တို့ ကစားပုံ တကယ်ကို ညံ့ဖျင်းခဲ့ပါတယ်။ ပိုကောင်းအောင် ကြိုးစားရမှာ ဖြစ်ပေမဲ့ အရင်ဆုံး ကိုယ့်အမှားကိုယ်ပဲ အာရုံစိုက်ဖို့ လိုပါတယ်။ ကျွန်တော်တို့မှာ အဘက်ဘက်က လိုအပ်ချက်တွေ ရှိနေခဲ့ပါတယ်။ ကိုယ့်ကိုယ်ကိုယ် ပြန်လည်သုံးသပ်ဖို့ လိုအပ်ပြီး အားနည်းချက်တွေကို ပြင်ဆင်ပြီး အကောင်းဆုံး ပြန်လာနိုင်အောင် ကြိုးစားရမှာပါ" လို့ ၎င်းက ဆိုပါတယ်။

သူက ဆက်လက်ပြီး "ကျွန်တော် ဂိုးသွင်းပြီးပြီးချင်းမှာပဲ သူတို့က ချက်ချင်း ပြန်ချေပနိုင်ခဲ့ပါတယ်။ ဒါဟာ သူတို့ကို ပွဲထဲ မြန်မြန်ဆန်ဆန် ပြန်ရောက်လာအောင် လုပ်ပေးလိုက်သလိုပါပဲ။ ကျွန်တော်တို့ဘက်က ဂိုးဦးဆောင်မှုရပြီးပြီးချင်း ပြန်ပေးလိုက်ရတဲ့ ဂိုးမျိုးတွေကို မဖြစ်အောင် ပြင်ဆင်ရပါမယ်။ အခုတော့ စိတ်ဓာတ်မကျဘဲ အကောင်းဆုံးဖြစ်အောင် ပြန်ကြိုးစားသွားမှာပါ" လို့ ဖြည့်စွက်ပြောကြားခဲ့ပါတယ်။