ဂျီရိုနာကို ရှုံးနိမ့်ခဲ့ပြီးနောက် သတင်းထောက်တစ်ဦးကို ဒေါသတကြီး တုံ့ပြန်ခဲ့တဲ့ ဖလစ်ခ်
တနင်္လာနေ့ညက ကစားခဲ့တဲ့ ကတ်တလန်ဒါဘီပွဲစဉ်မှာ ဂျီရိုနာကို ရှုံးနိမ့်ခဲ့ပြီးနောက် ဘာစီလိုနာနည်းပြ ဟန်ဆီဖလစ်ခ်ဟာ သတင်းထောက်တစ်ဦးကို အတော်လေး စိတ်တိုဒေါသထွက်ခဲ့ပါတယ်။
အဲဒီပွဲမှာ ဘာစီလိုနာက ၂ ဂိုး ၁ ဂိုးနဲ့ ရှုံးနိမ့်ခဲ့တာဖြစ်ပြီး ပွဲပြီးခါနီးမှာ ဖရန်ဘယ်လ်ထရန် သွင်းယူပေးခဲ့တဲ့ ဂျီရိုနာရဲ့ အနိုင်ဂိုးက အငြင်းပွားစရာ ဖြစ်ခဲ့ပါတယ်။ အဲဒီဂိုးမရခင် အစပြုတဲ့အချိန်မှာ ကလော်ဒီယို အီချီဗာရီက ဂျူးလက်စ်ကွန်ဒီကို ပြစ်ဒဏ်ဘောကျူးလွန်ခဲ့တယ်လို့ ဧည့်သည်ဘာစီလိုနာအသင်းဘက်က အခိုင်အမာ ပြောဆိုနေကြပါတယ်။
အဲဒီညကပွဲမှာ လာမိုင်းယာမယ်လ်က ပင်နယ်တီ လွဲချော်ခဲ့တာမျိုးလည်း ရှိခဲ့ပေမဲ့ ဂျီရိုနာရဲ့ အနိုင်ဂိုးကသာ ဖလစ်ခ်ကို ဒေါသပိုထွက်ခဲ့တာလည်းဖြစ်ပါတယ်။
ပွဲအပြီး အင်တာဗျူးမှာ ဖလစ်ခ်က အီချီဗာရီရဲ့ ဖြစ်ရပ်နဲ့ပတ်သက်ပြီး မေးမြန်းခြင်း ခံခဲ့ရပါတယ်။
"ကွန်ဒီနဲ့ ပတ်သက်တဲ့ ဖြစ်ရပ်အပေါ် ခင်ဗျားမှာ ဘာအမြင်မှ မရှိဘူးလား" လို့ ဖလစ်ခ်က သတင်းထောက်ကို ပြန်လည်မေးခွန်းထုတ်ခဲ့ပါတယ်။ သတင်းထောက်ဘက်က မရှိပါဘူးလို့ ပြန်ပြောတဲ့အခါမှာတော့ ဖလစ်ခ်က "ကောင်းပြီ၊ ကျွန်တော့်မှာလည်း မရှိဘူး" လို့ ပြန်ပြောခဲ့ပါတယ်။
အဲဒီနောက်မှာတော့ ဘာစီလိုနာနည်းပြဟာ စိတ်မကျေမနပ်ဖြစ်နေတဲ့ ပုံစံမျိုးနဲ့ အင်တာဗျူးနေရာကနေ ထွက်ခွာသွားခဲ့ပါတယ်။
