မန်ချက်စတာစီးတီး တိုက်စစ်မှူး အာလင်းဟာလန်းနဲ့ ပတ်သက်ပြီး သတင်းတွေ ထွက်ပေါ်နေချိန်မှာပဲ ဘာစီလိုနာ အသင်းဘုတ်အဖွဲ့ဝင် ဂျိုအန်ဆိုလာက အသင်းရဲ့ အပြောင်းအရွှေ့ ရည်မှန်းချက်တွေအကြောင်း ထုတ်ဖော်ပြောဆိုလာပါတယ်။

ဟာလန်းက သူ့ရဲ့အနာဂတ်အတွက် ရွေးချယ်စရာတွေကို စဉ်းစားနေချိန်မှာပဲ ပီအက်စ်ဂျီအသင်းက လာမယ့်နွေရာသီ အပြောင်းအရွှေ့ဈေးကွက် မတိုင်ခင် ဟာလန်းကို အံ့အားသင့်ဖွယ် ခေါ်ယူဖို့ ကြိုးပမ်းနေတယ်လို့ သတင်းတွေ ထွက်ပေါ်နေပါတယ်။

ဘာစီလိုနာကတော့ မားကပ်စ်ရက်ရှ်ဖို့ဒ်ကို ခေါ်ယူဖို့ အသင့်ဖြစ်နေပေမဲ့လည်း ဒီနွေရာသီမှာ စာချုပ်သက်တမ်းကုန်ဆုံးမယ့် ရောဘတ် လီဝန်ဒေါစကီးရဲ့ နေရာမှာ အစားထိုးဖို့ တိုက်စစ်မှူးတစ်ဦးကို ရှာဖွေနေတာပါ။

ဆိုလာက Cadena Ser သတင်းဌာနနဲ့ စကားပြောဆိုရာမှာ ဟာလန်းကို ခေါ်ယူနိုင်တဲ့ ငွေကြေးအင်အား ဘာစီလိုနာမှာ ရှိနေတယ်လို့ ဝန်ခံခဲ့ပေမဲ့ ဒီအပြောင်းအရွှေ့ဟာ ဖြစ်နိုင်ခြေရှိတဲ့ အခြေအနေမျိုးတော့ ဖြစ်ရမယ်လို့ ဆိုပါတယ်။

"ဟုတ်ပါတယ်၊ ကျွန်တော်တို့အနေနဲ့ ဟူလီယန် အယ်လ်ဗာရက်ဇ် ဒါမှမဟုတ် အာလင်းဟာလန်းလို ကစားသမားတွေကို ခေါ်ယူနိုင်စွမ်းရှိပါတယ်။ ဒီလို အပြောင်းအရွှေ့တွေက ငါးနှစ်အတွင်းမှာ သူ့ဘာသာသူ အရင်းကျေသွားမှာဖြစ်သလို ဘာစီလိုနာရဲ့ ဘဏ္ဍာရေး အခြေအနေကလည်း ဒါကို လုပ်နိုင်ဖို့ အသင့်ရှိနေပါတယ်" လို့ ဆိုလာက ပြောပါတယ်။

"ဒါပေမဲ့ နောက်ဆုံးမှာတော့ ဘာစီလိုနာအနေနဲ့ လစာပေးချေမှု ဖွဲ့စည်းပုံနဲ့ ပတ်သက်ပြီး အသင်းရဲ့ ကတိကဝတ်တွေကို သေချာ ဂရုစိုက်ရပါမယ်။ ကျွန်တော်တို့မှာ သတ်မှတ်ထားတဲ့ ကန့်သတ်ချက် ရှိပြီး အဲဒါကို ကျော်လွန်သွားမှာ မဟုတ်ပါဘူး။ ကျွန်တော်တို့ရဲ့ လစာပေးချေမှု ဖွဲ့စည်းပုံကို ထိန်းသိမ်းရင်း ကစားသမားတွေကို ဈေးကွက်ပေါက်ဈေးအတိုင်း ခေါ်ယူသွားရမှာပါ" လို့ သူက ဆက်ပြောပါတယ်။

ဟာလန်းရဲ့ စာချုပ်ထဲမှာ ရီးရဲလ်မက်ဒရစ် ဒါမှမဟုတ် ဘာစီလိုနာလို စပိန်ထိပ်တန်းကလပ်တွေက အသက်ဝင်စေနိုင်တဲ့ စာချုပ်ဖျက်သိမ်းကြေး အချက်အလက်တွေ ပါဝင်နေတယ်လို့ သတင်းတွေ ထွက်ပေါ်နေပေမဲ့ သူကတော့ လောလောဆယ် မန်စီးတီးအပေါ်မှာပဲ သစ္စာရှိနေဆဲလို့ သိရပါတယ်။

ဒီရာသီ ပရီးမီးယားလိဂ်မှာ ၂၂ ဂိုးအထိ သွင်းယူထားတဲ့ နော်ဝေ တိုက်စစ်မှူးဟာ ၂၀၂၂ ခုနှစ်မှာ ဒေါ့မွန်ကနေ မန်စီးတီးကို ရောက်ရှိလာခဲ့တာဖြစ်ပြီး အသင်းနဲ့အတူ ပထမဆုံး နှစ်ရာသီစလုံးမှာ ပရီးမီးယားလိဂ် ရွှေဖိနပ်ဆုကို ရရှိခဲ့သူပါ။

Sport သတင်းဌာနရဲ့ ဖော်ပြချက်အရ ဟာလန်းကိုသာ တကယ်တမ်း ဆွေးနွေးဖြစ်မယ်ဆိုရင် ပြောင်းရွှေ့ကြေးက ပေါင် သန်း ၁၀၀ ကျော်အထိ ရှိနိုင်တာကြောင့် ဟာလန်းရဲ့ အသင်းဖော် အိုမာ မာမူးရှ်ကို ဈေးသက်သာတဲ့ ပစ်မှတ်အဖြစ် သတ်မှတ်ထားတယ်လို့လည်း သိရပါတယ်။