ရူဘင်နီဗက်စ်ဟာ ဇန်နဝါရီ အပြောင်းအရွှေ့ကာလမှာ ပရီးမီးယားလိဂ်ကို ပြန်လာဖို့ စိတ်အားထက်သန်နေတာကြောင့် မန်ချက်စတာယူနိုက်တက်အတွက် ရွေးချယ်စရာတစ်ခုဖြစ်လာခဲ့ပါတယ်။ ၂၀၂၃ ခုနှစ်မှာ ဝုဗ်အသင်းကနေ အယ်လ်ဟီလယ်ထံ ပေါင် ၄၇ သန်းနဲ့ ပြောင်းရွှေ့ခဲ့တဲ့ နီဗက်စ်ဟာ လာမယ့်နွေရာသီမှာ စာချုပ်သက်တမ်းကုန်ဆုံးမှာဖြစ်ပြီး ဆော်ဒီကလပ်က သူ့ကို လာမယ့်လမှာ ပေါင် ၂၀ သန်းဝန်းကျင်နဲ့ ထွက်ခွာခွင့်ပေးဖို့ အသင့်ရှိနေပါတယ်။

ယူနိုက်တက်ဟာ ကတ်စ်မဲရိုး၊ ကိုဘီမိုင်နူးနဲ့ မာနူရယ်အူဂါတေးတို့ အိုးလ်ထရက်ဖို့ဒ်မှာ အနာဂတ်မရေရာတဲ့ အခြေအနေတွေနဲ့ ရင်ဆိုင်နေရတာကြောင့် ကွင်းလယ်ခံစစ်တစ်ဦးကို ရှာဖွေနေပါတယ်။ ကတ်စ်မဲရိုးဟာ ဇွန်လ ၃၀ ရက်နေ့မှာ စာချုပ်သက်တမ်းကုန်ဆုံးပြီးနောက် မေဂျာလိဂ်ကို ပြောင်းရွှေ့မယ်လို့ သတင်းတွေထွက်ပေါ်နေပါတယ်။  အူဂါတေးကတော့ ဒီရာသီ ပရီးမီးယားလိဂ်မှာ ၂ ပွဲသာ ပွဲထွက်ကစားခဲ့ရတာကြောင့် တူရကီကလပ်တွေရဲ့ စိတ်ဝင်စားမှုကို ခံနေရပါတယ်။ 

မိုင်နူးကလည်း ဩဂုတ်လက နာပိုလီကို အငှားသွားဖို့ တောင်းဆိုခဲ့တာကို ယူနိုက်တက်က ငြင်းပယ်ခဲ့ပြီးနောက် လာမယ့်လမှာ အသင်းက ထွက်ခွာဖို့ ကြိုးစားဦးမှာဖြစ်ပါတယ်။ ကလပ်သတင်းရင်းမြစ်တွေရဲ့အဆိုအရ ယူနိုက်တက်ဟာ ဇန်နဝါရီမှာ အလျင်စလိုခေါ်ယူမှုတွေ လုပ်မှာမဟုတ်ဘဲ နွေရာသီကနေ ၆ လစောပြီး လုပ်ဆောင်နိုင်မယ့် သဘောတူညီချက်တွေကိုသာ လုပ်ဆောင်သွားမယ်လို့ အလေးပေးပြောကြားခဲ့ပါတယ်။ 

ဆွေးနွေးနေတဲ့ နာမည်တွေထဲမှာ အီလီယော့အန်ဒါဆန်၊ ဝါတန်၊ ဂယ်လက်ဟာ၊ ဘလီဘာ၊ တိုင်လာအဒမ် နဲ့ ဂျာအိုဂိုမက်စ်တို့ ပါဝင်ပါတယ်။ မတ်လမှာ အသက် ၂၉ နှစ်ပြည့်မယ့် နီဗက်စ်က အသက်ကြီးပေမဲ့ ဝုလ်ဗ်မှာ ၆ နှစ်ကြာ ကစားခဲ့တဲ့ ပရီးမီးယားလိဂ်အတွေ့အကြုံရှိပါတယ်။  နယူးကာဆယ်နဲ့လည်း သတင်းထွက်နေတဲ့ ပေါ်တိုကစားသမားဟောင်းအပေါ် ယူနိုက်တက်က စိတ်ဝင်စားမှုရှိတယ်ဆိုတာကိုတော့ အခုထိ အတည်ပြုနိုင်ခြင်းမရှိသေးပါဘူး။