ကွာရာဘတ်နဲ့ပွဲမှာ တစ်ယောက်တည်း ၄ ဂိုးသွင်းပြီး အလန်ရှီးယားရဲ့စံချိန်ကို ရိုက်ချိုးခဲ့တဲ့ ဂေါ်ဒွန်
ဘာကူးမြို့မှာ ကစားခဲ့တဲ့ ချန်ပီယံလိဂ် ရှုံးထွက်အဆင့် ပလေးအော့ဖ် ပထမအကျော့ပွဲစဉ်မှာ နယူးကာဆယ်အသင်းက ကွာရာဘတ်အသင်းကို ၆ ဂိုး - ၁ ဂိုးနဲ့ အနိုင်ရရှိခဲ့ပါတယ်။ အဲဒီပွဲမှာ အန်တိုနီဂေါ်ဒွန်က ၄ ဂိုးအထိ သွင်းယူခဲ့တာကြောင့် ဟာရီကိန်းတို့လိုမျိုး ချန်ပီယံလိဂ်မှာ ဂိုးအများအပြား သွင်းယူနိုင်တဲ့ အထူးအဖွဲ့ဝင်စာရင်းထဲမှာ ပါဝင်လာခဲ့ပါတယ်။
ပွဲကစားချိန် ပထမပိုင်းမှာတင် ၄ ဂိုးအထိ သွင်းယူနိုင်ခဲ့တဲ့ ဂေါ်ဒွန်ရဲ့ အံ့အားသင့်စရာ စွမ်းဆောင်ရည်ဟာ အက်ဒီဟိုဝီရဲ့ နယူးကာဆယ်အသင်းကို ဒုတိယအကျော့ ကစားဖို့ လိုနေသေးပေမဲ့ နောက်တစ်ဆင့်တက်ရောက်နိုင်ဖို့ အခြေအနေကောင်းကို ဖန်တီးပေးနိုင်ခဲ့ပါတယ်။
အသက် ၂၄ နှစ်အရွယ် ဂေါ်ဒွန်ဟာ အခုရာသီ ပရီးမီးယားလိဂ်မှာတော့ ၃ ဂိုးပဲ သွင်းယူနိုင်သေးလို့ ရုန်းကန်နေရပေမဲ့ ဥရောပပြိုင်ပွဲတွေမှာတော့ သူ့ရဲ့ခြေစွမ်းက တကယ်ကို တောက်ပနေတာလည်းဖြစ်ပါတယ်။
ဒါ့အပြင် ဂေါ်ဒွန်ဟာ နယူးကာဆယ်အသင်းအတွက် ချန်ပီယံလိဂ် တစ်ရာသီအတွင်း ဂိုးအများဆုံးသွင်းယူနိုင်တဲ့ အလန်ရှီးယားရဲ့ စံချိန်ကိုလည်း ချိုးဖျက်နိုင်ခဲ့ပါတယ်။ ဒါ့အပြင် လူးဝစ်အဒရီယာနိုပြီးရင် ချန်ပီယံလိဂ်သမိုင်းတစ်လျှောက် ပွဲစဉ်တစ်ခုရဲ့ ပထမပိုင်းမှာတင် ၄ ဂိုးသွင်းယူနိုင်တဲ့ ဒုတိယမြောက် ကစားသမားအဖြစ်လည်း မှတ်တမ်းဝင်သွားခဲ့ပါတယ်။
