လေဗာကူဆင်အသင်းရဲ့ နည်းပြဖြစ်သူ ကတ်စပါယူးလ်မန်းက ချန်ပီယံလိဂ် ၁၆ သင်းအဆင့်မှာ အာဆင်နယ်အသင်းနဲ့ ရင်ဆိုင်ချင်တယ်လို့ ထုတ်ဖော်ပြောကြားလိုက်ပါတယ်။

လေဗာကူဆင်အသင်းဟာ ပလေးအော့ဖ်အဆင့်မှာ အိုလံပီယာကော့စ်အသင်းကို အနိုင်ယူပြီးနောက် အခုလို နောက်တစ်ဆင့်ကို တက်လှမ်းနိုင်ခဲ့တာပါ။

အခုဆိုရင် လေဗာကူဆင်အသင်းဟာ ၁၆ သင်းအဆင့်မှာ အာဆင်နယ် (သို့မဟုတ်) ဘိုင်ယန်မြူးနစ်အသင်းတို့ထဲက တစ်သင်းနဲ့ တွေ့ဆုံရတော့မှာ ဖြစ်ပါတယ်။ ဒီအခြေအနေနဲ့ပတ်သက်ပြီး နည်းပြယူးလ်မန်းက "ဒီနှစ်သင်းစလုံးက ဥရောပမှာ အကောင်းဆုံးအသင်းတွေပါ" လို့ ဆိုပါတယ်။

"အာဆင်နယ်အသင်းဟာ အခုလို လူစာရင်းမျိုးရဖို့နဲ့ ပရီမီယာလိဂ်၊ ချန်ပီယံလိဂ်ပြိုင်ပွဲတွေမှာ အဆင့်တစ်ခုရောက်အောင် ခြောက်နှစ်၊ ခုနစ်နှစ်လောက် အချိန်ယူ တည်ဆောက်ခဲ့ရတာပါ။ သူတို့ဟာ အချိန်အတော်ကြာ ပြင်ဆင်ခဲ့ရသလို အခုဆိုရင် ထိပ်တန်းကစားသမားတွေလည်း အများကြီး ရှိနေပါပြီ။ ဘိုင်ယန်မြူးနစ်ဘက်ကလည်း ကျွန်တော်တို့ဟာ အသင်းကောင်းတစ်သင်းဆိုတာကို သိပါတယ်။ အခုလောလောဆယ်မှာ သူတို့ဟာ ဥရောပရဲ့ အကောင်းဆုံးအသင်းနှစ်သင်း ဖြစ်နေလို့ ဒါဟာ ကြီးမားတဲ့စိန်ခေါ်မှုတစ်ခု ဖြစ်ပေမဲ့ ကျွန်တော်တို့ကတော့ ဒါကိုပဲ လိုလားပါတယ်" လို့ ၎င်းက ပြောပါတယ်။

ဆက်လက်ပြီး ယူးလ်မန်းက "အာဆင်နယ်နဲ့ တွေ့ချင်တယ်ဆိုတာကလည်း ဘိုင်ယန်မြူးနစ်နဲ့တင် တစ်လအတွင်း လေးကြိမ်လောက် ဆက်တိုက်ကစားရမယ့် အခြေအနေမျိုး ဖြစ်နိုင်တာကြောင့်ပါ။ ပွဲစဉ်တွေ အပြောင်းအလဲလေးဖြစ်သွားအောင် အာဆင်နယ်နဲ့ တွေ့တာက ပိုကောင်းမယ်လို့ ထင်ပေမဲ့ ဒီနှစ်သင်းစလုံးရဲ့ အဆင့်အတန်းကတော့ အတူတူပါပဲ။ သူတို့ဟာ အရည်အချင်း တကယ်မြင့်မားတဲ့အသင်းတွေပါ။ ဒါပေမဲ့ တစ်လတည်းမှာတင် ဘိုင်ယန်နဲ့ လေးပွဲတောင် ကစားရမယ့်ကိစ္စကတော့ ဘာတွေဆက်ဖြစ်မလဲဆိုတာ စောင့်ကြည့်ရမှာပါ။ အာဆင်နယ်နဲ့ ကစားရမယ်ဆိုရင်တော့ အပြောင်းအလဲလေး တစ်ခုဖြစ်သွားတာပေါ့" လို့ ရှင်းပြခဲ့ပါတယ်။