ဆီဗီလာရဲ့ပစ်မှတ် မာကာဒိုကို ကြားဖြတ်ခေါ်ယူဖို့ကြိုးပမ်းလာတဲ့ ချဲလ်ဆီး
အီကွေဒေါ လူငယ်ကြယ်ပွင့် ပက်ထရစ် မာကာဒိုကို ခေါ်ယူဖို့အတွက် ဆီဗီလာအသင်းရဲ့ ကြိုးပမ်းမှုကို ချဲလ်ဆီးအသင်းက နောက်ဆုံးအချိန်မှာ ကြားဖြတ်လုယူဖို့ လုပ်ဆောင်လာပါတယ်။
အသက် ၂၂ နှစ်အရွယ် မာကာဒိုကို အင်ဒီပန်းဒီးယန်းတေး ဒဲလ် ဗယ်လီအသင်းက ရောင်းချဖို့ နီးစပ်နေပြီ ဖြစ်ပါတယ်။
လာမယ့် နွေရာသီ အပြောင်းအရွှေ့ကာလမှာ အဆိုပါ ကွင်းလယ်လူကို ခေါ်ယူဖို့အတွက် ဆီဗီလာအသင်းက နှုတ်ကတိနဲ့ သဘောတူညီမှု ရရှိထားပြီလို့ AS သတင်းဌာနက ဖော်ပြခဲ့ပါတယ်။
စပိန်ကလပ် ဆီဗီလာဟာ မာကာဒိုကို ယူရို ၆ သန်းနဲ့ ခေါ်ယူနိုင်ဖို့ မျှော်လင့်နေတာပါ။
ဒါပေမဲ့ ဒီအပြောင်းအရွှေ့ဟာ အပြီးသတ်ခြင်း မရှိသေးသလို ပရီးမီးယားလိဂ်ကလပ်အသင်းတွေဆီကနေလည်း အပြိုင်အဆိုင် ကမ်းလှမ်းမှုတွေ ရှိနေတယ်လို့ သိရပါတယ်။
အင်္ဂလန်ထိပ်သီး ချဲလ်ဆီးအသင်းကတော့ ဒီအပြောင်းအရွှေ့ကို ကြားဖြတ်ဝင်ရောက်ပြီး ကွင်းလယ်လူကို အရယူဖို့ မျှော်လင့်နေတာပါ။ ချဲလ်ဆီးဟာ အရင်ကလည်း ကန်ဒရီ ပေ့စ် အပြောင်းအရွှေ့နဲ့ ပတ်သက်ပြီး အင်ဒီပန်းဒီးယန်းတေး ဒဲလ် ဗယ်လီအသင်းနဲ့ လက်တွဲလုပ်ဆောင်ခဲ့ဖူးတဲ့ သာဓက ရှိပါတယ်။
အဆိုပါ အီကွေဒေါ ကစားသမားရဲ့ အင်ဒီပန်းဒီးယန်းတေး ဒဲလ် ဗယ်လီနဲ့ ချုပ်ဆိုထားတဲ့ စာချုပ်ဟာ ၂၀၂၇ ခုနှစ်အထိ သက်တမ်းရှိနေပါတယ်။
